Skip to main content

Neqimut savaaqqat ikinnerusut

Kujataani panernersuata kinguneranik savaaqqanik toqoraaviit ikinnerusuni aamma uumasunik minnerusunik pissarsiaqarput

Aasaq naallugu Kujataani savaatilinnut 42-nut unammilligassaq annertooq tassaasimavoq panernersuaqarnera, tamanillu neriuutigineqarsimavoq savat savaaqqallu amerlassusaannut oqimaassusaannullu sunniutaasussaq minnerpaaffimminiikkumaartoq, KNI-p aviiseeraani Paartumi tamanna atuarneqarsinnaavoq.

Uumasut ikinnerusut mikinerusullu
Savaaqqanik savanillu tunisineq toqoraanerlu naammassimmat tamarmik ernummatigisimasaat uppernarsineqarpoq. 2014-mut sanilliullugu savaaqqat savallu 2.392-nik ikinnerusut ukiormanna toqoraavimmut tunineqarput, ukiullu siulianut sanilliullugu savaaqqat 1,3 kilomik oqinnerupput.

Taamaalilluni katillugit 19.938-it toqorarneqarput, savaaqqat 18.425-t savallu 1.513-it. 

2 millionit annaaneqartut
Savaaqqat toqorarneqartut ikinnerunerat, kaaviiaartitanit 2 millionit koruuninik annaasaqaataavoq.

- Siunissami allaanngortoqanngippat kaaviiaartitatigut annaasaq taamatut ittoq Neqi A/S-imut annertuumik kinguneqarsinnaavoq, Neqimi pisortaq Per Jensen Paartumi erseqqissaavoq.

Atuaruk: Nunalerisut panernersuarmit eqqugaasut

Amerlanerusunik tigusisinnaagaluartoq
Taassuma oqaatigaa, uumasunik toqoraavimmi uumasut 33.000-it nioqqutissiarineqarsinnaasut, taamalu nioqqutissiorsinnaassuseq atorneqanngitsoq savaaqqallu tunisat ikiliartortut suliffeqarfimmut pitsaanngitsumik kinguneqarsinnaanerarpaa, 
aningaasatigut imminut napatisinnaasumik ingerlatsinissaq angujuminaallisinnaammat.

Aamma pissutsit ilorraap tungaanut ingerlalernissaat ukiut arlallit qaangiuppata savaaqqaat savallu amerliartulernissaat aatsaat pisinnaassasoq Neqi ilimasuppoq.

Taamaattumik savaatilinnut uumasunillu toqoraavimmut iluaqutaasussamik aaqqiissutissamik nassaarniarnitsinni Namminersorlutik Oqartussat peqataanissaat pingaaruteqarluinnarpoq alajangiisooqataassallunilu, pisortaq isumaqarpoq.

Nersutit amerlanerusut
Nersutit pillugit savaaqqat savallu tunineqartut ikinnerugaluartut illuatungaani nersutaatit tunineqartut ukiup siulianut sanilliullugu amerlanerupput. Igalikumi, Qanisartuuni Narsallu Iluaniit tunineqartut ukiormanna 46-uupput, 2014-mut sanilliullugu 17-nik amerlanerusut, tassa siorna tunineqartut 29-llutik. 

Nersussuit tunineqartut saniatigut Narsap eqqaani Tuttutuumiit tuttut 87-it Neqimut tunineqarput. 

Atuaruk: New Zealandimit savaaqqat tikisitat suliffissaqartitsisut

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER