Forsvaret i Arktis

Aaja: Illersornissamut tunngatillugu nutaamik isumalioqqinnissaq pisariaqartoq

Aaja Chemnitz Larsen (IA) illersornissamut ministeri Peter Christensen (V) ataatsimeeqatigaa. Ataatsimiinnermi politikerit taakkua marluk Kalaallit Nunaanni Illersornissatigut suliassarpaalutsigut qanoq naammassinnittoqarsinnaaneranik eqqartueqatigiipput

Folketingimut ilaasortaq Aaja Chemnitz Larsen (IA) aamma illersornissamut ministeri Peter Christensen (V), Illersornissatigut suliassarpaalutsigut qanoq naammassinnittoqarsinnaaneranik eqqartueqatigiipput

Inuit Ataqatigiit folketingimut ilaasortaatitaat Aaja Chemnitz Larsen aamma illersornissamut ministeri Peter Christensen (V), ataasinngornermi ataatsimiipput, tassanilu Kalaallit Nunaanni Illersornissatigut suliassarpaalutsigut qanoq naammassinnittoqarsinnaaneranik eqqartueqatigiipput.

Pingaartumillu ministerip Kalaallit Nunaanni piumassutsimik aallaaveqartumik upalungaarsimasussanik pilersitsinissamut akuersornera Aaja Chemnitz Larsenip nuannaarutigivaa.

- Teknologiimik nutaalianik atuilluarsinnaaneq erseqqissaatigaara, soorlu annaassiniarnerni dronit satellittillu atorluarneqarsinnaaneri. Ministerilli Kalaallit Nunaanni piumassutsimik aallaaveqartumik upalungaarsimasussanik pilersitsinissamut akuersornera pingaartumik nuannaarutigivara, Aaja Chemnitz Larsen tusagassiorfinnut nalunaarummini oqarpoq.

Nutaamik isumaliorneq
IA-mi politikerip ataatsimiinnermi Kalaallit Nunaanni illersornissaqarfiup suliassanik naammassinninnissaatigut nutaanik isumaliortoqartariaqalersoq erseqqissarpaa

- Arlalitsigut unammilligassaqartoq ilisimavarput, soorlu silap pissusaa nunallu isorartunera eqqarsaatigalugit, taamaattorli aamma periarfissarpassuit ullumikkut atorluarneqanngitsooqqasut illisimavarput. Ilaatigut illersornissaqarfiup politiillu suliassaanut nalinginnaasunut sineriammiuusugut sumiiffinnillu ilisimannilluartuusugut annertunerujussuarmik atorluarneqarsinnaanerput ilaatigut pineqarpoq, Aaja Chemnitz Larsen erseqqissaavoq.

Issittoq
Illersornissamut ministerip ilisimatitsissutigivaa, Kalaallit Nunaanni piumassutsimik aallaaveqartumik upalungaarsimassussanik pilersitsinissaq Illersornissaqarfiup Issittumi annertuumik misissoqqissaagaanut ukiup matuma naannginnerani naammassisussatut naatsorsuutigineqartumut ilaasoq.

Ministerip misissueqqissaarneq tamanna suli takusimanngilaa, Nunanili avannarlerni upalungaarsimatitatigut pitsaasunik misilittagaqarnertik erseqqissarpaa, taakkunani piumassutsiminnik sumiiffinnik ilisimasaqartutut upalungaarsimatitat illersornissaqarfimmut politiinullu assut iluaqutaasarmata.

Soqutiginninneq annertooq
Piumassutsimik upalungaarsimasussanik pilersitsinissamut aalajangiinissaq 2016-imi ukiakkut illersornissamut isumaqatigiissummut isumaqatigiinniarnernut atatillugu pissaaq.

- Illersornissaqarfiup 2015-imi upernaakkut paasisassarsiorluni angalaarnerani illersornissaqarfiup suliassaanut peqataanissaq assut soqutigineqartoq paasineqarpoq, taamaanneranili kalaallit peqataanissamut periarfissaasigut inerisaajuarnissaq pisariaqarpoq, tassanilu piumassutsimik aallaaveqartumik upalungaarsimasoqarnissaq tulluarluinnartuuvoq” Aaja Chemnitz Larsen naggasiivoq.

Ataatsimiinnermittaaq Kalaallit Nunaanni sakkutooqarfikuni avatangiisinik saliinissaq eqqartorneqarpoq, Kangilinnguit ilanngullugit, Illersornissaqarfiup Ujaasinernut Annaassiniarnernullu suliassaqarfia, amerikkarmiut Kalaallit Nunaanniinnerat kiisalu Naalagaaffeqatigiinnerup iluani killeqarfiliinikkut akornutinut killiffik eqqartorneqarput, tassami Illersornissamut ministeri aammattaaq Nunanut Avannarlernut tunngasutigut ministeriuvoq.

Powered by Labrador CMS