Qasigianguani isornartorsiuineq

Suliffissuup pisortai annakannajaarput

Kristian Jeremiassen, kommunimi politikeri Qasigiannguanilu aalisakkanik suliffissuarmi atorfilik isumaqarpoq, pissutsit pitsaanerulinngippata qullersat taarserneqartariaqartut

Kristian Jeremiassen: – Aalisakkanik suliffissuarmi tunisassiorneq ingerlaavartinniarlugu naammattunik sulisoqarnissaq Qaasuitsup Kommuniata Royal Greenlandillu siulliullugu sulissutigisariaqarpaat. Tamanna ajornarpat, isumaqarpunga allanik aaqqiissutissarsiortoqartariaqartoq, Kristian Jeremiassen, Siumut, Qaasuitsup Kommuniani kommunalbestyrelsimi Isumaginninnermut Ataatsimiititaliami siulittasoq oqarpoq.

Royal Greenlandip Qasigiannguani aalisakkanik suliffissuani ajornartorsiortumi, sulisussaaleqinermut qullersat aqutsinerlunnerannik sulisut sinniisuata Gaba Rosbachip tamanut ammasumik oqarnera tassunga annertuumik kinguneqarpoq.

Pingasunngormat unnukkut innuttaasunik ataatsimiititsineq

Ippassaq unnukkut Qasigiannguit timersortarfianni innutaasunik ataatsimiititsisoqarpoq peqataaffigineqarluartumik. Innuttaasunik ataatsimiititsineq aaqqissuunneqarsimavq Royal Greenlandip Sulisunik Piginnaanngorsaanermut immikkoortoqarfianit, Qasigiannuani aalisakkanik suliffissuarmit, SIK-mut aammalu Qaasuitsup Kommunianit.

Tassani oqaluuserineqarpoq ajornartorsiorneq qanoq qanoq isilluni pitsaanerpaamik qaangerneqarsinnaanersoq. Ataatsimiinnermi Royal Greenland oqarpoq, suliffissuaq sulisussanik suli pissarsiuminaatsitsisoq.

Ataatsimiinnermi Siumumeersoq Kristian Jeremiassen, aalisakkanik suliffissuarmi sulisoq Qaasuitsullu kommunalbestyrelsiani isumaginninnermut ataatsimiititaliami siulittaasuusoq, kommunimi politikeritut panelimi peqataavoq.

Taanna oqarpoq Royal Greenlandip Qaasuitsullu Kommuniani suliffissarsiuussisarfiup, ataatsimoorlutik sulissutigisariaqaraat suliffissuarmut sulisussarsiornerup ullumikkuminngarnit pitsaanerulernissaa.

Aaqqiissutissaq alla

Aalisakkanilli suliffissuaq siunissami sulisussaaleqiuassappat allaanerusunik aaqqiissutissarsiortariaqarpoq, Kristian Jeremiassen isumaqarpoq. Taassuma Gaba Rosbach tapersersorpaa, oqarlunilu pisimasumut nuanniitsumut tamarmut pitsaanerpaamik aaqqiissutaasinnaasoq aalisakkanik suliffissuarmi qullersat taarserneqarnerat.

– Frank Hagen (suliffissuup pisortaa, aaqqiss.) siunertagissaaraluarpoq, anguniakkalli piviusunngortinnissaa ajornakusoorsimavoq. Taamaattumik paasisinnaanngilara sooq Royal Greenland taama sulisussarsiuminaatsitsitigisoq, illoqarfimmi suliffissarsiortut taama amerlatigigaluartut. Taamaattumik qullersat taarsertariaqarsinnaapput, tamatumuuna pissutsit pitsaanerusumut ingerlalersinnaassappata, politikeri oqarpoq.

Kristian Jeremiassen aamma isumaqarpoq naqisimanninniarnerusoq, sulisut sinniisaata aviisinut Tamananut Avannaanut Sermitsiaq.AG-mullu oqaaseqarnini pissutigalugu allakkatigut mianersoqqussummik tunineqarsimammat.

Suliffissuup pisortaa Frank Hagen tamanna pillugu oqaaseqarnissaminut periarfissaqarsimanngilaq.

Ullumikkut Qasigiannguani suliffissarsiortut 22-upput.

Powered by Labrador CMS