Skip to main content

Greenland Express Air attavigineqarsinnaajunnaartoq

Timmisartuussinissat suli utaqqisitsipput, maanna aamma Greenland Express Air telefonikkut attaveqarfitik matuaat. Aappariit kalaaleq danskerlu annertuumik ikiortissarsiortariaqartut

- Greenland Express Airimut sianerputit. Ulaperuttulerneq pissutigalugu ajoraluartumik sianertut maannakkut akisinnaanngilagut.

Greenland Express Airip pisinianut saaffiginnittarfianut sianeraanni taama nalunaarut nipeqarpoq.

Normorli taanna Gert Braskip suliffeqarfiutaanit pigineqanngilaq, kisiannili 'Discover The Worldimik' pigineqarpoq. Suliffeqarfik københavnimiittoq angalatitsivinnut minnerusunut sullissisartoq.

Telefoni nammineq akisartunngorlugu inisseqqanera sullissisut ulaperuttulernerannit pissuteqartariaqanngilaq. Magdy Meharib Discover The Worldiminngaanneersoq ilisimatitsivoq, tamanna Greenland Express Airip kissaateqarneratigut pisoq: 

- Discover The Worldip normu taanna Greenland Express Airimut atukkiussaraa. Atuisutsinnut tamanna pineqartumut atuuppoq. Telefon normu taanna Greenland Express Airip qanoq atussanerlugu nammineq aalajangigassaraa.

Atuaruk: Atuisartunut Siunnersuisoqatigiit Greenland Express Air misissuiffigigaat

Magdy Meharib aamma ersarissaavoq, Greenland Express Airip pisisartui taamaallaat attaveqarniarunik e-mailimut innersuunneqassasut:

- Greenland Express Airimut attaveqarneq tamarmi email-adressekkut sales@greenlandexpress.dk pissaaq, tamanna aamma atuisup aalajangigaraa.

Kalaaleq danskerlu aappariiit taamaatinnernut eqqugaasut
Greenland Express Airip taamaatitsineranut aamma telefonikkut atuisunut attaveqannginnermut annertuummik eqqugaasut ilagaat aappariit Nivi Paviasen aamma Brian Clausen. Aappariit kujataanut nuunniarlutik akikitsumik angalanissartik naatsorsuutigisimagaluarpaat:

- Angalanissagut katillugu pingasoriarluta nuutsippagut, taamaammallu aningaasat utertinnissaat pitsaanerusoq aalajangiupparput. Naggataagut Air Greenlandimut billetsisisariaqassagunarpugut, tamannalu billetsissaraluatsinnut sanilliullugu ajoraluartumik akisunerujussuuvoq. Kisianni Odensimi inigisarput Narsamut aallarniarluta qimareeratsigu allanik periarfissaqarpallaanngilagut.

Atuaruk: Greenland Express Airip aallarnissat tamaasa taamaateqqippai

Nivi Paviasenimut tamanna pisoq, annertuumik nalornisitsisimavoq:

- Qaqugu aallassanersugut oqaatigiinnarsimasuugunikku iluarsimassagaluarpoq. Ajornerpaasimavoq tulleriinnik kinguartitsisaqattaarneq, tassami aallarnissarput aallarfissat naapertorlugit piareersaraluarparput. Maannakkut neriuutigaarput qaammatip naanerani ilaqutariinnut festeqatigiinnissaq angumerissallugu.

Atuaruk: Gert Braskip taamaatitsinermut nassuiaataa eqqunngitsoq

Kinguartitseqqinneraasit
Ukiormanna Greenland Express Airip pilersaarnera malillugu 2. juli timmisartuussilertussaagaluarpoq, kisianni julip aallaqqaataani kinguartitsisoqarpoq, 14. juli ilanngullugu angalanissat tamarmik unitsinneqarput. Julip 13-ianili aamma angalanissat kinguarteqqinneqarput, tamannalu ukioq manna Greenland Express Airip suli timmisartuussinnginneranik isumaqarpoq - siusinnerpaamillu 27. juli timmisartuussissalluni.

Greenland Express Airip pisortaanera Gert Brask Sermitsiaq.AG-mit sivisuumik apersorneqarumasimanngilaq. Qaammat manna siusinnerusukkut aamma taamatut nalunaarpoq. Sermitsiaq.AG-p Greenland Express Air oqaloqatiginiartuaraluarpaa.

Sermitsiaq.AG-p Greenland Express Airimit suli oqaaseqartitsinissaq sulissutigaa.

Greenland Express Air pillugu allaaserisat tamaasa uani atuakkit

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER