Qajartorneq
Qajartorneq soqutigineqaleraluttuinnarpoq
Qajartorneq soqutigineqaleraluttuinnarpoq. Pingaartumik meeqqat inuusuttullu amerlanerusut qajartorneq timersuutitut soqutigilersimavaat, Sisimiuni qaannamik nunatsinni pissartanngorniunnerup kingorna Qaannat Kattuffiat taamatut paasissutissiivoq
Qajartorneq soqutigineqaleraluttuinnarpoq, pingaartumillu meeqqat inuusuttullu amerlanerusut nunatsinni qaannamik pissartanngorniunnermi peqataasalerput.
– Meeqqat inuusuttullu amerligaluttuinnartut qajartorneq timersuutitut soqutigilersimavaat, qaannamillu nunatsinni pissartanngorniunnermut peqataanissaq soqutigineqaleraluttuinnarpoq, Qaannat Kattuffianni siulittaasoq Jacob-Peter Enoksen oqarpoq.
Qaannamik nunatsinni pissartanngorniunnermi, ukioq manna Sisimiuni juulip 6-anniit 12-ianut ingerlanneqartumi, katillugit 104-t peqataapput, siorna pissartanngorniunnermi 68-iinnaat peqataasimasut.
– Peqataasut amerleriarnerannut ilaatigut pissutaavoq meeqqat inuusuttullu amerlanerusut qajartortalerannik, ´qajartortartutoqqallu´ qitornartaarnermik kingorna uteqqissimammata.
Taamatut oqaluttuarpoq Qaannat Kattuffianni siulittaasoq Jacob-Peter Enoksen, taassumalu ineriartorneq nuannaarutigalugu Sermitsiaq.AG-mut oqaatigaa.
Aaqqissuussineq naammassilluarpoq
Qaannat Kattuffianni siulittaasoq naapertorlugu nunatsinni qaannamik pissartanngorniunneq ingerlalluarsimavoq, pissartanngorniunnerlu tamaat silagissiorsimapput. Ilulissanit, Sisimiunit, Nuummit Qaqortumillu peqataasoqarpoq, sisamallu nunanit allaneerlutik, marluk USA-mit, ataaseq Frankrigimit ataaserlu Sverigemit.
Nunatsinni qaannamik pissartanngorniunnermi unammissutini qulingiluani unammisoqarpoq. Unammissutini assigiinngitsuni tamani angusarissaarnerpaat ukiumi ´Qajartullammattut´ toqqarneqarput, angutini arnanilu. Ukioq manna ´Qajartullammanngorput´ qatanngutigiit Nuummeersoq, Erik Amondsen aamma Malina Amondsen, taakkualu pokalinnatsinneqarput.
Nunatsinni pissartanngorniunnermit angusat talerpia'tungaani filimi takusinnaavatit. Sisimiuni ilinniarnertuunngorniarfimmi ilinniartitsisup Mikkel Larsenip, piumassutsiminik sulisoq alla peqatigalugu angusat katersorsimavai. Taakkualu Qajaq Sisimiut Facebook-imi quppernerani saqqummiullugit.
Qaannamik nunatsinni tullianik pissartanngorniuttoqassaaq Nuummi 2016-imi juulimi.