Skip to main content

Oqallinneq: IA kiffaanngissuseqarpoq

IA inersuarmi qaqugukkulluunniit taasisinnaatitaavoq. IA-p assersuutigalugu tamanna ingerlappaa Folketingimut siulittaasussamik qinersisoqarnerani, Aaja Chemnitz Larsen oqallisissiami takkajaami ilisimatitsivoq.

Inuit Ataqatigiit oqaluttuarisaanermi erseqqinnerpaamik inissiipput, IA sinnerlugu Folketingimut ilaasortaq Aaja Chemnitz Larsen IA-p Folketingimi atuuffia pillugu saqqummiussami takkajaami allappoq.

Aleqa Hammondip ullumi oqaaseqaammi Aaja Chemnitz Larsen isornartorsiorpaa.

Aaja Chemnitz Larsen ima allappoq:

Inuit Ataqatigiit nuannaarutigaaq qinersinermi kingullermi uppernarsaratsigu kalaallit Folketingimut ilaasortaatitaat danskit ilaasortaatitaasorluinnaq danskillu partiivisorluinnaq pissusilersorsinnaasut, ataatsimiititalianik pilersitsinerni inutaaliinernilu. Uagutsinnut pisariaqarsimaanngilaq danskit partiivisa ilaata Folketingimi ilaasortaatitaanut ilanngunnissaq, inissismaffinnik tunineqarumalluni.

Inuit Ataqatigiit qinersinermi kattusseqatigiit aappaluttut, nalinginnaasumillu Folketingimi sulinermi, partiit allat tassunga ilaasut assigalugit, suleqataaffigivaat. Taasisarnermut isumaqatigiissuteqartarnissaq pillugu isumaqatigiissuteqarpugut, kisianni qaqugukkulluunniit kattusseqativut Folketingillu inatsisilerinermut allattoqarfia nalunaarfigisinnaavagut inersuarmi taaseqataajumalluta, taamalu pisoqartillugu uagut isumarput malilluinnarlugu taasisarpugut. Assersuutigalugu taamaaliorpugut Folketingip siulittaasussaanik qinersisoqarmat.
 
Aamma uagut isumarput malilluinnarlugu ataatsimiititaliani sulinermi taasisarpugut.
 
Inissisimaffiit arfinillit aalajangersimasumik peqataaffigisatta saniatigut aamma isumaqatigiissuteqarpugut, ataatsimiititaliani taarsiisinnaalluta, suliassat peqataaffigerusutavut oqallisigineqassatillugit. Tamatuma kinguneraa uagut aammattaaq ataatsimiititaliani danskit partiivi assigalugit peqataasinnaagatta.
 
Taamaalilluta danskit partiivi naligilluinnarlugit inissisimavugut, Folketingimilu partiitut allatorluinnaq nammineersinnaassuseqarluta.
 
Taamaammat aamma uagut naqisimanerata taasisinnaatitaanerput pilliutigiumanngilarput, Venstre-p neqeroorutaata akueraneratigut - Kalaallit Nunaannut Ataatsimiititaliami siulittaasuunermik taarserlugu.
 
Isumaqarpugut pisariaqarsimasoq erseqqissumik danskit partiivinut nalunaarutigissallugu, kalaallit partiivi Folketingimiittut partiitut allatorluinnaq pissusilersorsinnaatitaasut. Folketingimi inissisimafffiit piumagutsigit danskit partiivinut ilaalernissarput pinngitsaaliissutaassariaqanngilaq.
 
Soqutiginarpoq paasillugu uagut naligiittut pineqarnissamik kissaatitsitsinnut Folketingimi partiit akerliunerpaat, tassaammata naalakkersuisunik toqqammavilersuisuusartut Socialdemokratit aamma Venstre.
 
Inuit Ataqatigiit Kalaallit Nunaat aamma siunissami Kalaallit Nunaannit Folketingimi ilaasortaasarumaartut pillugit erseqqissumik killiliipput. Danskit partiivisa Folketingillu ataatsimut isigalugu maanna paasivaat, Kalaallit Nunaanni parteeqartoq danskit partiivisorluinnaq pineqarnissaminik kissaateqartumik. Inuit Ataqatigiit partiitut naqisimaneqannginnerput nammineersinnaanerpullu pigiinnarparput, naak ataasiinnarmik ilaasortaatitaqaraluarluta.
 
Danskit partiiannut aalajangersimasumut pituttunngikkaluarluta inissisimaffiit arfinillit pissarsiarivagut, tamannalu tulluusimaarutigaarput. 
 
Siumut kaammattoraluarparput peqatigaluta Kalaallit Nunaannut Ataatsimiititaliami siulittaasutut inissisimaffiup kalaallimik inuttalernissaata qularnaarnissaa sulissutigissagipput. Tamanna Siumumiit kissaatigineqanngilaq, tamannalu tusaatissatut tiguarput.
 
Danskit, kalaallit Savaliimmimormiullu partiivinik qinersivimmi aallarteqqammisatsinni suleqatiginissaat qilanaarivarput. Suliassaqaqaagut. Taakkulu maannamiit allanit salliutittariaqarpavut.
Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER