Apeqqutit
Apeqqutinik akissuteqartoq: Inuit Ataqatigiinnit Múte Bourup Egede
Folketingimut qinigassanngortittut katillugit 17-iusut tamarmik apeqqutinik akinisaqarnissamik periarfissinneqarput. Inuit Ataqatigiinnit Múte Bourup Egede apeqqutigineqartut akissuteqarfigai
Sermitsiaq.AG-mi atuartartut arlaqartut Folketingimut qineqqusaartunut apeqquteqarput. Apeqqutit pitsaanerpaat aaqqissuisoqarfimmit toqqarneqarput.
Qineqqusaartut apeqqutit akisimalereeraangassuk nittartakkamut saqqummiunneqartassapput. Isumaqatigiissutaareersumit akissutigineqartut takinaarneqarsimagaangata akissutaat naalisarneqartassapput.
Kina statsministerissatut toqqarpiuk?
- Kalaallit Nunaata soqutigisaanut sulissuteqarusuttoq statsministerisut tapersersussavara.
Periarfissinneqaruit Namminersornermut isumaqatigiissut nutarterusussaviuk? (Aap imaluunniit naamik)
- Naamik, Namminersornissamut isumaqatigiissut amerlanerussuteqarluartunit taperserneqarpoq. Naalagaaffiup maannakkut suli akissussaaffigisaasa ilaat oqartussaaffigineqalernissaat isumaqatiginninniutigineqassaaq (akissut naalineqarpoq)
Danmarki sorsunnernut assigiinngitsunut iluatsiffiunngitsunut peqataasareerpoq. Naalagaaffeqatigiinnermi illersornissamut politikkikkut Kalaallit Nunaat sunniuteqaqataanerussava? (Aap imaluunniit naamik)
- Aap. Danmarkip sorsukkiartunnginnerani Inatsisartut aalajangeeqataatinneqassapput Naalagaaffeqatigiinnermit sorsukkiartoqassappat.
Kalaallit ilinniarluarsimasut Danmarkimi najugaqartuusut qanoq angerlartinneqassapat?
- Attaveqaqatigiittoqaqqaassaaq. Politikkerit inuussutissarsiornermilu suliffeqarfiit suleqatigiissapput ilinniartut angerlartinneqarnissaat anguniarlugu.
Kalaallit Danmarkimi najugaqartunut pitsaanerusumik sullissisoqassava?
- Kalaallinut isumaginninnermut sullissinernut aningaasaliisoqassaaq. Aamma innuttaasunut akuliunnissaanut pitsaanerusumik sullissisoqalissaaq.
Naalagaaffeqatigiinnermi killeqarfitsigut aporfiit atorunnaarsinneqassappat? (Aap imaluunniit naamik) aamma suut peerneqarnissaat illit pingaarnerpaatippiuk?
- Aap. Sullissineq eqaallisarneqartariaqarpoq sulisartunut inuussutissarsiornermillu suliaqartunut iluaqutaasussamik.
Naalagaaffeqatigiinneq ineriartorteqqinneqassava? (Aap imalluunnit naamik) Qanoq?
- Namminersulivinnissaq anguniagassaavoq. Naalagaaffeqatigiinnitsinni ineriartortitsiuassaagut tamannalu ataqqeqatigiinnermik ingerlanneqassaaq.
Aleqa Hammondip Folketingimut qineqqusaarnera pissusissamisoorpa? (Aap imaluunniit naamik)
- Pisortat aningaasaataannik atornerluineq akerleraarput. Kisianni qinersisartut aalajangissavaat Aleqa Hammondip qinigassanngortinnera pissusissamisoornersoq.