Skip to main content

Qineqqusaarutitut plakatinut qalluisoqarsimanera Siumup Inuusuttaanit utoqqatsissutigineqarpoq

Inuit Ataqatigiit plakaatiinut 'Blå Blok' ikkussorneqarsimapput. Siumup Inuusuttaanit taakku ikkussorneqarsimapput

Inuit Ataqatigiit plakaatiinut Siumup Inuusuttaasa ikkussuisimanerat utoqqatsissutigineqarpoq. 

- Siumup Inuusuttunut Suliniaqatigiiffiata Nuummi immikkoortortaa Ataatsinngornermut unnuaa Inuit Ataqatigiit Qineqqusaarutaannut plakatinut assigisaanullu qalluillutik oqaaseeqqanik kusanaatsunik nipitissuisimapput, SIS-imit tusagassiutinut nalunaarummi allapput.

- Siumup Inuusuttunut Suleqatigiiffiata Nuna tamakkerlugu siulersuisuisa taama iliuuseqarsimaneq akuersaanngilluinnarpaat. Taamaammallu Siulersuisuunerit aalajangerput S.I.S Nuuk sinnerlugu Inuit Ataqatigiit Partiiannut aammalu qineqqusaartitaannut pisortatigoortumik utoqqatsissallutik.

- Iliuuserineqartoq kusananngilaq, nunatsinni kulturitsinnut ilaanngilaq inoqatitsinnik nakkarsaalluni qineqqusaartitsineq. S.I.S-ip ileqqoraa pissuserissaartumik ingerlatsineq, Siumup Inuusuttaasa siulittaasuat Konrad Boye aamma siulittaasup tullia Ineqi Kielsen allapput.

Taamaattumik S.I.S Nuuk peqquneqarpoq unnuaa qalluillutik suliarisimasatik tamarmik piaarnerpaamik piiassagaat.

Kusanaatsuliorneq
Inuit Ataqatigiit Inuusuttaasa taamatut iliortoqarsimanera kusanaatsuliornertut oqaaseqarfigaa. 

- Taamatut pisoqarnera kusananngilluinnarpoq uippallernertullu isigineqartariaqarluni. Qinersisoqarnissaanut politikkimik oqalunniarta. Inuit Ataqatigiit Inuusuttaat oqaaseqarput. 

Inuusuttut politikkikkut suliaqartut maligassiuisussaasut Inuusuttut Ataqatigiinnit oqariartuutigineqarpoq. 

- Isummat assigiinngikkaluartut ataqqeqatigiinneq uagut inuusuttut timitalertussaavarput, IA-p inuusuttaanit oqariartuutigineqarpoq. 

DF-imut tapersersuineq?
Inuit Ataqatigiinni siulittaasoq Sara Olsvig sapaatip akunnerata siuliani statsministerimut piumasaqaateqarpoq. 

Aamma Folketingimi talerperliuniat IA-mit pakatsissutigineqarpoq, Lars Løkke Rasmussenillu tapersersorneqarnissaa suli qulakkeerneqanngitsoq oqaatigineqarluni. Siumup Folketingimi ilaasortaata Doris Jakobsenip sapaatip akunnerata siuliani aamma oqaatigaa, Venstre tapersersoraanni Dansk Folkepartimut tapersersuinerusoq. 

Tamanna pinngitsoortinniarlugu Siumut qineqqusaarnermi sulissuteqarpoq. 

Siumup taamatut qineqqusaarnera aamma IA-mit isornartorsiorneqareerpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER