Siumut periarfissamik suli allamik saqqummiussisoq

Siumut piffissaq kingullerpaaq atorlugu qinigassanngortitamik nutaamik saqqummiussivoq. Qinigassanngortittoq tassaavoq inuussutissarsiornermut aatsitassanullu naalakkersuisuusimasoq Jens Erik Kirkegaard. Nammineq Sermitsiaq.AG-mut oqarneratut nukittoqutigisai tassaapput nunat tamalaat akornanni inuussutissarsiornermut politikkimik misilittagaqarnini Aleqa Hammonditullu tusaamanerlugaannginnini.

Jens Erik Kirkegaard Aleqa Hammondip qinigassanngortinneranut isorinnippaluttumik isiginnittaaseqarnermigut Siumumi immikkoortumut nutaatut pilersinneqaqqammersumut ilannguppoq.

Atuaruk: Erik Jensenip Aleqa Hammond unammillerpaa

- Nunatsinnut nunani allani nipiorusuppunga tatiginartoq. Nunatut aningaasaliiffissaqqissutut oqaatigineqarsinnaalernissarput sorsuutigerusuppara, isumaqarpungalu nukittuffikka aamma tassaniittut, oqarpoq.

'Periarfissatut allatut' tutsuiginassutsimik qulakkeerinnikkusuttutut qinigassanngortipputit. Imaappa qinigassanngortittoq pingaarneq Aleqa Hammond tatiginartutut isiginngikkit?

- Uagut politikerit Kalaallit Nunaat sinnerlugu aallartitaanerput eqqaamassavarput. Siumumi qinigassanngortitassanik toqqaaneq eqqarsaatigalugu aallaavittut isumaqarpunga tamanna siulersuisut aalajangigassarigaat, tassa qinigassanngortittut piumasaqaatinik naammassinnissimappata.

Allaaneruvunga - tusaamanerlugaanngilanga

- Allali tassaavoq sunik naleqartitaqarnitsinnik takutitsisarnerput. Neriuppunga inuit qinigassanngortittut tusaamanerlugaanngitsutut tatiginartutut periarfissatut allatut isigiumassagaannga.

Jens Erik Kirkegaard qineqqusaarutimini SIK malillugu aningaasarsialinnut sulisartunulli aamma allanut saaffiginninnerarpoq.

- Sulisartut pillugit Folketingimut qinigassanngortippunga. Ilaqutariippassuit piffissami matumani ilungersunarnerusumik inuuneqalersimapput. Kalaallit Nunaat naleqartitat tatiginninneq, ataqqinninneq naligiinnerlu tunngavigalugit nammaqatigiiffiusumik nukittuumillu ataatsimooqatigiiffiusoq anguniarpara. Aalisartuugaanni, piniartuugaanni atorfiliugaanniluunniit ataatsimooqatigiinnissarput aatsaat taama pingaaruteqartigilersimavoq.

Atuaruk: Naalakkersuisup allattaata facebookikkut allagaa aalassatitsivoq

Misilittagartooq

Jens Erik Kirkegaardip inuussutissarsiornermut aatsitassanullu ukiup aappaa affaq sinnilaarlugu naalakkersuisutut misilittagaqarsimanini tikkuarpaa. Kalaallit Nunaata aningaasaliiffigissallugu isumannaatsuuneranik qularutiginninnerit tamarmik maanna peerneqartariaqalerput.

- Nunat allat Kalaallit Nunaanni aningaasaliinissamut periarfissaannik piumassusaannillu nukittorsaarusuppunga. Politikerit arlallit pingaartumik Danmarkimi Kalaallit Nunaat aningaasaliiffigissallugu mianersorfigisariaqartutut oqaatigisarpaat.