ikiorsiineq

Eqqumiitsuliornikkut atuakkianut, nipilersornermut, arsaannermut nalunnermullu aningaasaliisoqarpoq

Nunat Avannarliit Killiit Illoqarfiisa Pingaarnersaasa Aningaasaateqarfiannit B-67, Nunani Avannarlerni Piorsarsimassutsikkut Attaveqaat NAPA, Nuummi Nipilersornermik Ilinniarfik kiisalu Nuummi Naluttartut Klubbiat aningaasaliiffigineqarput

Reykjavik
Illoqarfiit pingaarnersaasa aningaasaateqarfiannit aningaasat Reykjavikimi ataatrsimiinnermi agguaanneqarput. Ataatsimiinneq aappaagu Nuummi ingerlanneqassaaq.

Nunat avannarliit killiit illoqarfiisa pingaarnersasa aningaasaateqarfiata 200.000 koruuninik agguaassineranit kikkut aningaasaliiffigineqassanersut tamanut saqqummiunneqarpoq, ukioq mannalu Kommuneqarfik Sermersuumit qinnuteqartut aningaasaliiffigineqarput.

200.000 koruunit, ukioq manna Kommuneqarfik Sermersuumut aningaasaliissutigineqartut kommunimi suliniutinut tallimanut tunniunneqarput.

Taakkua tassaapput
1. B-67, U15 arsartartut peqatigiiffiat: Rey Cup-imut Islandimi peqataaneq. Peqatigiinnikkut arsalerinermullu tunngasutigut pikkorissarneq. Unammisaqattaarnikkut ilisimasassanik katersineq aammalu Island peqatigalugu arsalerinikkut ataatsimoorussat pillugit paarlaasseqatigiinneq.
20.000 koruunit aningaasaliissutigineqarput.
2. NAPA, Kalaallit Nunaanni Nunani Avannarlerni Piorsarsimassutsikkut Attaveqaatiit: Nunat Avannarliit 2040. Ullumikkut inuusuttut Islandimeersut, Savalimmiuneersut, Kalaallit Nunaanneersut Ålandimeersullu siunissaminnik qanoq isiginninnerat immaqalu immikkorluinnaq qanoq nunat avannarliit ataatsimoornerannut/nunat avannarliit siunissaannik isiginninnerat pillugu oqaluttuartunik oqaluttuaaraliat allaaserisalluunniit arlallit.
76.000 koruunit aningaasaliissutigineqarput.
3. Strygeorkesterforening Agiartartoqatigiit aammalu Nuummi Nipilersornermik Ilinniarfik: NYSS-imut peqataaneq, nunani avannarlerni meeqqat inuusuttullu agiartartoqatigiit katerisimaarnerat.
30.000 koruunit aningaasaliissutigineqarput.
4. NAPA, Kalaallit Nunaanni Nunani Avannarlerni Piorsarsimasutsikkut Attaveqaat: Nuummi Nunat Avannaamioqatigiit. Peqatigiiffiit eqqumiitsuliortullu akunnerminni suleqatigiinneq annerusoq. Pilersaarutigineqarpoq nunat avannarliit filmiliortaatsikkut workshoppeqartinneqassasut Kalaallit Nunaannit, Islandimit, Savalimmiormiunit, Qallunaat Nunaanniit aammalu Norgemiit peqataaffigineqartumik. Reykjavikkimeersut Tórshavnimeersullu isiginnaariat Nuummut qaaqquneqassapput.
50.000 koruunit aningaasaliissutigineqarput..
5. Nuummi naluttartut Klubbiat, Nuuk Svømmeklub: Reykjavik International Games. Klubbip peqataarusunneranut siunertarineqarpoq naluttartut klubbiata ineriartortinneqarnissa inuusuttullu piginnaasaasa ineriartortinneqarnissaat.
Naluttartut Klubbiat Kalaallit Nunaanni kisiartaalluni naluttartut klubberaat tamannalu peqqutaalluni timersornikkut klubbit allat assigalugit klubbinik allanik unammisaqattaartarnissamut periarfissaqanngilaq.
24.000 koruunit aningaasaliissutigineqarput.

Tórshavnimi pingasut qinnuteqarsimapput, taakkulu katillugit 100.000 koruuninik tunineqarput. Reykjavik-imi arfinillit qinnuteqarsimapput, taakkulu katillugit 150.000 koruuninik tunineqarput.

Nunat Avannarliit Killiit Illoqarfiisa Pingaarnersaanni Aningaasaateqarfiup ataatsimoorussamik kulturikkut ilinniartitsinikkullu aaqqissuussatigut Reykjavikkimi, Tòrshavnimi Nuummilu innuttaasut politikkerillu akornanni paaseqatigiinnerunissap suleqatigiinnerunissallu nukittorsarnissaa siunertarineqarpoq. Aningaasaateqarfiup aningaasaatai tassaapput ukiumoortumik Kommuneqarfik Sermersuumit, Reykjavik Kommunimit aammalu Tórshavn Kommunimit aningaasalersorneqartoq.

Aningaasaateqarfiup ukiumoortumik aningaasaliissutitut agguaattarpai 300.000 koruunit nalingat. Ukioq mannali 450.000 koruunnit agguaanneqarput, tamatumunnga pissutaavoq siulersuisut 2014-imi Tórshavnimi ataatsimiinnerminni aalajangiukkamikku 2015-imi aningaasaliissutitut utertinneqartut 150.000 koruunit ilanngullugit agguaanneqassasut.

Illoqarfiit pingaarnersaasa aningaasaateqarfiannut ukioq manna qinnuteqartut katillugit 21-iupput, taakkunanngalu 14-it tunineqarput. Tassalu aamma Kommuneqarfik Sermersuumi tallimat.

Ataatsimiinnermi aamma aalajangiunneqarpoq tullianik ataatsimiinnissaq Kommuneqarfik Sermersuumi Nuummi, Kalaallit Nunaanni Inuiattut Ullorsiorneq Juunip 21-iat 2016 eqqorlugu pissasoq.

Aningaasaateqarfik siulersuinik qulingiluaasunik siulersorneqarpoq, inuttaqarluni illoqarfiit pingaarnersaasa pingasuusut borgmesteriannit kommunalbestyrelsimi/byrådimilu ilaasortaannit marlunnik. Kommuneqarfik Sermersuumit ilaasortaapput borgmester Asii Chemnitz Narup aamma kommunalbestyrelsimut ilaasortat Per Berthelsen Malene Lyngelu.

Powered by Labrador CMS