assammik arsarnermi GM
Assammik arsarnermi GM: GSS-ip arnartai angutitaalu pissartanngoqqittut
Arnat angutillu pissartanngorniutivimmat Nuummi Inussivik isiginnaarianik ulikkaavipoq
Sapaatiummat bronzinnanniunnerit marluk, guultinnanniunnerillu marluk pipput. GSS-ip arnartai angutitaalu guultinnaqqippat. Norsaq HC, angutit, aamma SAK, arnat, bronzinnattut. Isiginnaariat pikkusutsitaavissorput, tupaallannanngitsumillu GSS-ikkut, angerlarsimasut, illersorneqarnerpaallutik.
Pissaanermik takutitsineq
GSSip angutitaasa Norsaq HC naapimmassuk GSS-ikkut pissaanertik takutippaat. Pissartanngorniunnerit ingerlanerini holdit taakku naapimmata GSS sukataartitaavissorpoq, målinilli sisamanik ajugaalluni. Ippassaq taama pisoqanngilaq. Tassami GSS unammineq aallartilaaginnartoq siuapiloorpoq, Norsaq HC-lu tupaqqasutut illuni.
Unammineq GSS-ikkut aquppaat. Assersuinermi iluatsilluarput, saassussinermilu unitsitassaanatik. Muninnginnermi GSS målinik arfinilinnik siuaqqavoq. Arlaleriarlutik Norsaq HC-kkut aallartilersutut isikkoqartararput, GSS-imili måliniittoq, Isaaq Olsen, arsarluaqaaq Norsaq HC-kkullu unittoortittarlugit.
GSS-ikkut pinnguapajaaginnarlutik 30-eraarlutik pissartanngorput, Norsaq HC 14-eraartoq.
Arnani GSS aamma pissartanngorpoq. NÛK guultinnakkusunnera takuneqarsinnaagaluarpoq. GSS-illi måliniittua, Aviaaja Heilmann, annaassisaqattaarpoq NÛK-lu kinguaraluttuinnarluni. GSS måliniittua unamminermi aaliangiisuulluni GSS pissartanngoqqippoq.
Ukioq manna holdimut ilunnguttut ukuupput:
Arnani:
Målmand: Aviaaja Heilmann GSS. Stregimiittoq: Nivi Berthelsen GSS. Playmaker: Najaaja Lyberth GSS. Back saamerleq: Lykke Frank Hansen GSS. Backi talerperleq: Christina Lange Nûk. Fløji saamerleq: Sascha Kilimi Nûk. Fløji talerparleq: Anja Heilmann SAK.
Angutini:
Målmand: Isak Olsen GSS. Stregimiittoq: Eqalunnguaq Kristiansen GSS. Playmaker: Muusaarannguaq Ostermann-Søholm Norsaq HC. Back saamerleq: Gustav Ostermann Egede Nûk. Backi talerperleq: Danny Brandt GSS. Fløji saamerleq: Lars Ole Lyberth GSS. Fløji talerparleq: Inuujuk Ostermann-Søholm Norsaq HC.
Målernerpaat ukuupput:
Arnani:
Gerdaaraq Ingemann N-48 54 isertitaqarluni. Lykke Frank Hansen GSS 35-inik isertitaqarluni. Linda Madsen SAK 31-inik isertitaqarluni.
Angutini: Inuujuk Ostermann Søholm Norsaq HC 56-inik isertitaqarluni. Nuka Peter Ottosen N-85 46-nik isertitaqarluni. Kiisalu NÛK-miit Miki Johnsen 45-nik isertitaqarluni.
Sermitsiaq.AG assinik ilanngussiumaarpoq ullup ingerlanerani