assammik arsarneq

Arnat assammik arsartartut Cubamit ajorsartinneqarput

Amerikap Nunavissuani Pissartanngorniunnissamut anngunniulluni Puerto Ricomi unammiuaarnermi aallarnisaataasumik unamminermi kingullermi kalaallit arnat assammik arsartartut arfininngormat ajorsartinneqarput

Kalaallit arnat assammik arsarluni nunanut allanut unammisartut arfininngormat Cubamut ajorsarput

Amerikap Nunavissuani Pissartanngorniunnissamut anngunniulluni Puerto Ricomi unammiuaarnermi kalaallit arnat assammik arsartartut San Juan-imi Convensions Center-imi unammisartik ajornarnerpaaq unammivaat. Unammineqarpoq Cuba, kalaallillu unammisartut ajorsarnissartik killilersimaarniaannavippaat.

Unamminerup immikkoortua siulleq naammat Cuba 18-8-mik siuarsimavoq. Unamminerup immikkoortuata aappaani Kalaallit Nunaat amerlanerusunik isertitsigaluartoq Cuba siuarsimavallaaqaaq, unamminermilu Cuba 32-24-mik ajugaavoq, taamatut tusagassiorfinnut nalunaarutikkut oqaluttuarpoq Kalaallit Nunaanni Assammik Arsartartut Kattuffiat.

Sungiusaasup ikiortaa Johannes Groth imatut oqarpoq:

– Nalusimanngilarput Cubamut ajugaanissaq ajornakusuussasoq, tamannalu iluatsissappat pisariaqarpoq assersuinitta saassussisarnittalu aallaqqaataanit tamakkiisumik iluatsittarnissaat, nunanut allanut unammisartut sungiusaasuat oqarpoq nangillunilu:

– Ajoraluartumik unamminerup immikkoortuani siullermi teknikkikkut kukkunerpassuaqartarpugut allaallu iserteriaannaat annaasarlutigit, taamaattumillu Cuba ajugaaffigisinnaanngilarput. Pissutsilli pitsanngortissinnaagutsigit ajugaaffiginissaannut periarfissaqarpugut. Maajip 20-anni Cubami unammiuaarnerup aallartinnginnerani angerlarluta pissutsit tamakkua iluarsiniassavagut.

– Takusinnaavarput Cuba saassussigaangat assersuilluartaraluarluta, ullumikkulli assersuinitsigut iluatsitsinnginnersaavugut, Johannes Groth naggasiivoq.

Arfininngormat unamminermi kalaallit isertitsisut:

  • Mia Egede Rasmussen 9
  • Najaaja Lyberth 6
  • Panu Grønvold 3
  • Anja Heilmann 2
  • Sofia Lyberth 1
  • Kathrine Mikkelsen 1
  • Arnannguaq Steenholdt 1
  • Lykke Frank Hansen 1
Powered by Labrador CMS