Skip to main content

Ernumassuteqartut peqqinnissaqarfimmut attaveqaqqullugit kajumissaarneqarput

Peqqissutsimut naalakkersuisuungallartup, Siumumeersup Martha Lund Olsenip, psykiaterip qaratsamigut ajoqusersimasup nunatsinni sulisimanera saqqummiunneqareersorlu, nakorsartissimasut ernumassuteqartut peqqinnissaqarfimmut saaffiginneqqullugit kajumissaarpai

Sermitsiaq.AG-mi siusinnerusukkut allaaserineqareersutut psykiateri qaratsamigut ajoqusersimasoq, Danmarkimi napparsimasunik kukkusumik arlaleriarluni nakorsaasimasoq, aamma nunatsini katillugit sapaatip akunnerini qulingiluani 2005-imi aamma 2006-imi sulisimavoq.

Peqqissutsimut naalakkersuisoqarfimmit ilisimatitsissutigineqarpoq psykiaterip qaratsamigut ajoqusersimasup 2005-imi sapaatip akunneri suliffigisimasai tassaasut: 41, 42, 49-52 2005-imi kiisalu aamma 2006-imi sapaatip akunneri 1, 4 aamma 5 pineqartut. 

- Napparsimasut ilaqutaasullu akornanni pisup matuma apeqquteqarfigerusunneqarnera paasisinnaavara. Pisumut matumunnga tunngatillugu ernumassuteqartoqartut toqqissisimanngitsulluunniit, nappaatip oqaloqatigiissutiginissaa pillugu peqqinnissaqarfimmut saaffiginneqqullugit kajumissaarusuppakka, peqqissutsumut naalakkersuisuungallartoq, Siumumeersoq Martha Lund Olsen oqarpoq. 

Atuaruk: Psykiateri qaratsamigut ajoqusersimasoq IA-mit isumakulunnartinneqarpoq

Inuit Ataqatigiit sulisimaneranut paasisaqarnerorusupput
Psykiateri qaratsamigut ajoqusersimasoq nunatsinni aamma sulisimasoq saqqummiunneqareersorlu Inuit Ataqatigiit Folketingimi ilaasortaatitaat, Johan Lund Olsen, aamma paasisaqarusulerpoq psykiateri qaratsamigut ajoqusersimasoq Dronning Ingridip Napparsimavissuani taartaasimanermi saniatigut, aamma Kriminalforsorgenimut sullissisimanersoq.

Taamaaliorpoq danskit inatsisinik atortitsinermut ministerianut Socialdemokraatineersumut Mette Frederiksenimut apeqquteqaateqarnermigut.

- Qujanartumik kukkusumik nappaammik suussusersisoqarsimappat kukkusumilluunniit nakorsaasiisoqarsimappat, tarnikkut nappaatillit tamarmik nakorsanit immikkut ilisimasalinnit, peqqissaasunit sundhedsassistentinillu akuttunngitsunik takuneqartarmata, paasilertorneqarsimassasoq, peqqinnissaqarfik naliliivoq. Nakorsaanerup tarnikkut nappaatinik immikkut ilisimasallip kisimiilluni nakorsaanngisaannarnera napparsimasullu peqqinnissakkut sullissisunit allanit nakkutigineqartuarnerat, erseqqissassalluguttaaq pingaaruteqarpoq, Martha Lund Olsen oqarpoq. 

Nakorsaaneqarfiup suliaq misissuiffigaa
Martha Lund Olsenip paasissutissiinera najoqqutaralugu Nunatsinni Nakorsaaneqarfik nakkutilliissuutitaasoq pisumik tamatuminnga ilisimatinneqarsimavoq. 

- Peqqissutsimut naalakkersuisumut qanoq inassuteqateqarnissap naliliiviginissaa siunertaralugu, Nunatsinni Nakorsaaneqarfik, nakorsap pineqartup Dronning Ingridip Napparsimmavissuani sivikitsuaqqanik taartaagallartarnera pillugu, qulaajaalluni aallartippoq, naalakkersuisoqarfimmit taama allapput, pisorlu tunngavigalugu napparsimasut nappaatertik pillugu oqaloqatiginnikkusukkuttut, illoqarfigisaminni peqqissaavik attavigisinnaangaat innersuussutigalugu. 

Atuaruk: Nunarput akuersissutinik arsaarinnittoqartillugu ilisimatinneqarneq ajorpoq

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER