Skip to main content

Assit takukkit: Arnat futsalimi GM-ernerat

Arnat nunatsinni pissartanngorniunnerat ingerlanneqarmat arfininngorneq isaatitaqarfiulluarlunilu pissanganartorsiorfiuvoq

UB-68-ip  Uummannameersup aamma UB-83-ip Upernavimmeersup unamminerat sekundi kingullerpaaq atorlugu aalajangiiffigineqarpoq. Unammineq periarfissarpassuarnik isertitsinerpassuarnillu tunniussaqarpoq. UB-68 unamminerup annerpaartaani kinguaqqavoq, naak arsamik tigummiarnerpaagaluarluni amerlaneriarlunilu isertitseriaraluarluni.

Unamminermi minutsimi kingullermi UB-33 4-3-mik siuaqqavoq, sekundilli 20-iinnanngortullu UB-68 isertitsimmat 4-4mik naligiiginnartoqarnissaa ilimanarsilluni. UB-68-illi sekundi kingullerpaaq atorlugu arsaq unammisaminnit tiguaa unamminermilu aalajangiisuusumik isertitsilluni. UB-68 5-4-mik ajugaavoq.

Pissartaanerminnik illersuisut ilimagineqarluartut
Pissartaanerminnik illersuisut Nuummi NÛK-meersut Ilulissaneersunut I-69-imut unammipput. NÛK I-69-ip ajuutsitsinaveersaartuisigut tunioraalluarlutik akulloqqunnermikkut siualertorput.

I-69-ili ajorsaannarusunngilaq. NÛK-p siuaqqanerminnik illersuiniarneranut ajornakusoortitsipput. Pissartat immikkoortumi siullermi 2-1-imi siuaqqapput. Arsaattut unamminerminni naligiikkaluaqisut NÛK nukittunerulaarpoq. Taamaalilluni Nuummeersut 3-2-mik ajugaapput.

Arnat Qaqortumeersut, K-33, timmisartumik tikeqqammersut unaminissartik siulleq aallartinngitsiartoq timersortarfimmut apuuteqqarput. Nuummeersunut B-67-imut unammipput. B-67 1-0-mik immikkoortup siulliup inernerisaanik siualertorpoq.

B-67 ajuutsitsinaveersaarluarpoq, K-33-meersullu navianarsigaangata B-67-imi målmandi Paornánguak Isaksen paarsilluartarluni.

B-67 immikkoortut aappaanni 2-0-mik siuarpoq, unamminerlu aalajangiiffigineqareersutut isikkoqalerluni. Taavali K-33-meersut unamminerup naajartulernerani iluatsitsipput 2-1-imullu isertitsillutik. Unammineq pissanganarseqqippoq, isertitsisoqaqqinngitsoorlunili. Nuummeersut 2-1-imik ajugaapput.

Nuummeersut semifinalimi inissani malunnaateqarluartut
B-67-ip semifinalimi I-69 unammissavaa. NÛK semifinalimi inissamik qularnaarinnippoq. Kikkut NÛK-mut unamminisaat sapaammi paasinarsissaaq. K-33-p arfinilinnik pointinnassimasup sulilu ataasiarluni unammisussaasup Nagtoralik Paamiuneersoq unammissavaa. K-33 ajugaaguni semifinalimut toqqaannartumik ingerlaqqissaaq. Ajorsarpalli Disko-76 arfineq-marlunnik pointinnassimasoq semifinalimut ingerlaqqissaaq.

Isertitsinerpaat aajuku:
Mikkala Tobiassen, I-69, aamma Aili Pedersen, NÛK, 10-nik isertitsisut
Karen Louise Vetterlein, I-69, aamma Laila Platou, NÛK, 6-nik isertitsisut

Pissartanngortut sapaammi nassaarineqassapput. Unamminerit nal. ataatsimut aallartissapput.

Assit allaaserisap ataaniittut takukkit

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER