Royal Greenlandip ineriartornera Kim Kielsenimit nuannaarutigineqarpoq
Nunatsinni aalisakkanik tunisassiortut annersaat Nuummi immikkut ittumik ataatsimeersuarpoq pingasunngornermi. Aamma siulersuisuni ilaasortaasut pingasunik ilaneqarput
Royal Greenland Nuummi immikkut ittumik ataatsimeersuarpoq ullumi pingasunngornermi.
Ingerlatseqatigiiffiup ukiumi naatsorsuusiorfiusumi kingullermi 2011/12-imi angusarissaarnerpaaffigisani angusinnaasimavaa taamaalillunilu aamma akileraarutit ilanngaatigereernagit angusarissaarluavissimalluni.
Akileraarutissat ilanngaatigereernagit 199 millioner koruuninik sinneqartooruteqarfiuvoq, akileraarutissat ilanngaatigereernerisigut sinneqartoorutit 136 millioner koruuniullutik, 'tamatumalu ingerlatseqatigiiffiup 2009-miit aningaasaqarnikkut ilorraap tungaanut ingerlajartulersimaneranik ersiutaavoq', Naalakkersuisut siulittaasuat Kim Kielsen, Siumut, oqarpoq.
Kisianni akileraarutissat ilanngaatiginagit taamatut angusarissaarnerup fabrikkinik ingerlatseqatigiiffinnillu tunisaqarsimanernit sunnerneqarpoq, tunisaqarsimanerillu pissutaallutik ingerlatseqatigiiffiup ilanngaatissat ilanngaatigereernagit kaaviiaartitai appariarsimallutik.
Ineriartorneq Kim Kielsenip nuannaarutigaa
Naalakkersuisut siulittaasuat, immikkut ittumik ataatsimeersuartoqarnerani peqataasoq, Royal Greenlandip ineriartornera nuannaarutigaa, ingerlatseqatigiiffiulli suli ineriartornissaa neriuutigaa.
- Inuusuttut suliffimmi sungiusartut amerlisartariaqarpagut sulisullu piginnaanngorsarlugit, tassanissaaq Royal Greenlandip tamatumuuna iliuuseqaqataanini takutippaa 'Royal Greenlandip piginnaasanik ineriartortitsinera' sulissutigalugu tamannalu aamma suliffeqarfimmik ingerlatsilluarnikkut anguneqarsinnaasoq ersersinneqarpoq, Kim Kielsen Tusagassiivimmut oqarpoq.
Siulersuisuni ilaasortanngortut
Nunatsinni suliffissuaatimini suliassat annertusinerisigut Royal Greenlandip ukiumi naatsorsuusiorfiusumi 2013/2014-imi Kalaallit Nunaanni sulisorisartakkani 8 procentimik amerleriartissimavai. Ineriartorneq ingerlatseqatigiiffiup 'North Atlantic Champion'-imik taallugu iliuusissatut pilersaarutaa malillugu ingerlaannartussatut Naalakkersuisunit naatsorsuutigineqartoq.
Ataatsimeersuarnermi Tim Ørting Jørgensen, Jan H. Lynge-Petersen aamma Åse Aulie Michelet siulersuisuni piginnaasassat pisariaqartinneqartut aallaavigalugit siulersuisuni ilaasortassatut toqqarneqarput. Taamaalilluni ingerlatseqatigiiffimmi siulersuisuni ilaasortat amerlineqarlutillu nukittorsarneqarput, soorluttaaq ingerlatseqatigiiffiup malittarisassai naapertorlugit siulersuisuni ilaasortassat tamakkerlugit inuttalerneqarsimalersut.
Sermitsiami allaaserineqartoq 'Royal Greenland ullumikkornit marloriaammik anginerorusuttoq' atuarneqarsinnaavoq. Aviisi ataani pisiariuk:
