Nuna tamakkerlugu Inimi attartortuni 398-ini akiitsoqarnertik pissutigalugu anisinneqarnissaminnut ulorianartorsiortuni 122-it Qaasuitsup Kommuniani najugaqarput.

Nunatsinni kommuunip avannarlersaanni inunnik isumagininnermi ataatsimiisitaliap siulittaasua, Siumumeersoq Jess Svane, kommuunip inunnik isumaginninnermi ataatsimiisitaliaani siulittaasutut, Qaasuitsup Kommuniata borgmesterianut, Siumumeersumut Ole Dorphimut, marlunngornermi piumasaqarpoq misissuisoqassasoq nuna tamakkerlugu inissianut attartortakkanut akiitsut qaffakkiartorneri pilllugit isumasioqatigiittoqarsinnaaneranut.

- Isumaqarpunga kommuunit aamma Inatsisartuni ataatsimiisitaliat susassaqartut ataatsimoorlutik isumasioqatigiittariaqartut attartornermut akiitsut qaffakkaluttuinnartut pillugit, Jess Svane oqarpoq.

Atuaruk: Jess Svane: Inigisamut akiliut apparujussuarli

Atuaruk: Knud Kristiansenip ‘kiffaq-konto’ eqqukkusunngilaa

Akiliutit suli qaffasippallaarsorai
Jess Svanep siorna nammineerluni siunnersuutigaa attartortut akiitsui qaffakkaluttuinnartut akiorniarlugit ineqarnermut akiliutit malunnaatilimmik appartinneqartariaqartut. Ullumikkullu suli taama isumaqarpoq.

- Pisortat, kommuunit Namminersorlutillu Oqartussat, inissiaatitik arlalippassuartigut attartortittarpaat allaat attartortup akigititaasoq nammineerluni nammassinnaasarnagu. Taamaattumillu aamma pisortat taakkorpiaat aamma attartortitaminnut ineqarnermut tapiissutit isumaginninnikkullu tapiissutit aqqutigalugit, attartortut pisinnaatitaaffeqaraangata, tapiissuteqartarput, Jess Svane oqarpoq.

Taamaammat suil isumaqarpoq ininut attartortinneqartartunut akigititat appartinneqartariaqartut, attartortut nammineq akilersinnaasaannut.

- Ilumoorsinnaanngilarmi pisortat attartortitsisutut aamma attartortunut boligsikringit tapiissutillu allat atorlugit, attartortut pisinnaatitaaffigippassuk, tapiissuteqartariaqartarnerat, Jess Svane oqarpoq.

Tamatuma saniatigut Jess Svanep oqaluttuaraa Qaasuitsup Kommunia ilaqutariinnik meerartalinnik anisitaasoqartillugu aamma taakkununnga ikiuuttariaqalersartoq.

Atuaruk: Attartortut 398-t akiitsoqarneq pissutigalugu anisitaanissartik utaqqivaat

Atuaruk: Narsami attartortut arlaqartut anisitaasussatut inissisimasut