Nunafonden
Nunafondenimi siulersuisut inissipput
Siumumeersoq Nikolaj Jeremiassen Nunafondenimi siulersuisut inissititermata siulittaasutut toqqarneqarpoq
Inatsisartunut qinersisoqareermat Inatsisartut Nikolaj Jeremiassen, Kim Hansen, Steen Lynge, Johan Lund Olsen aamma Ane Hansen Nunafondenip siulersuisuini ilaasortassatut toqqarpaat, Bikubenfondenip Søren Kaare-Andersen siulersuisuni ilaasortassatut toqqaqqikkaa.
Maannalu Nunafondenip siulersuisortaavi inissititersimalerput. Tamanna pivoq januaarip 23-ani, tassani Siumumeersoq Nikolaj Jeremiassen siulittaasutut toqqarneqarpoq.
Siulersuisut inissititereerlutik ima inissipput:
- Nikolaj Jeremiassen, siulittaasoq
- Kim Hansen, siulittaasup tullia
- Steen Lynge, siulersuisuni ilaasortaq
- Johan Lund Olsen, siulersuisuni ilaasortaq
- Ane Hansen, siulersuisuni ilaasortaq
- Søren Kaare-Andersen, siulersuisuni ilaasortaq
Atuaruk: Juliane: Taamaattumik Nunafondenip aningaasartuutai qaffapput
Siulersuisunngortut nutaat akuersissuteqarfimmi atuuttumi 9,3 millioner koruunit akuersissutaassasut aaliangiuppaat, taakkualu saniatigut patajaallisaanermut 2 millioner koruunit illikartillugit.
Aningaasaateqarfiup isertitai, Grønlandsbankenimi piginneqataassutinik aningaaseriviullu sinneqartoorutaanik agguagassarsianik pilersitaasartut, naatsorsuuteqarnerup naalernerani takkuttarmata naatsorsuutigineqarpoq isertitassat 2014-mitut annertussuseqarnissaat.
- Aningaaserivik aaliangissagaluarpat minnerusumik agguagassiiniarluni tamanna siulersuisut akuersissumminut qanoq kinguneqassanersoq nalilersoqqissamaarpaat.