Skip to main content

Qeqqussat niuerutigineqarsinnaanerat neriuutigineqarpoq

Qaasuitsup Kommuniata isumaqasioqatigiisitsinissaa, nunanit tamalaanit peqataaffigineqartussaq, ataasinngornermi aallartinneqassaaq

Inuussutissarsiutit pillugit isumasioqatigiinneq nunatsinnit, Danmarkimit, Islandimit, Frankrigimit kiisalu USA-mit peqataaffigineqartussaq Ilulissani ataasinngornermi aallartippoq.

Neriuutigineqarpoq isumaqasioqatigiisititsineq qulequtserneqarsimasoq ‘Arctic Must’, Qaasuitsullu Kommunianit pingasunngorneq ilanngullugu ingerlanneqarniartoq, nunanut tamalaanut qeqqussanik niuernermik kinguneqarumaartoq.

Taama isumasioqatigiisitsinermi aqutsisoq Mads Thimmer, Innovation Lab-imi pisortaaneq, Sermitsiaq.AG-mut oqarpoq.

Pingasoqiusamik sammivilik
Mads Thimmerip nassuiaanera naapertorlugu isumasioqatigiinneq, oqaatigineqareersutut pingasunngorneq ilanngullugu ingerlanneqartussaq, pingasoqiusanngorlugu sammivilerneqarsimavoq.

Sammiviusussaq siulleq Ilulissat Kangiata ilisimatusarfissaanut tunngavoq. Isumasioqatigiinnermi peqataasussat nunat tamalaaneersut ilisimatusarfissap qanoq atorneqarsinnaanera sammissavaat.

Sammisassat aappaat tassaavoq inuussutissarsiornermut tunngasut. Tassani peqataasut sumiiffimmi inuussutissarsiornerup nunarsuarmioqatigiinnut qanoq siammerteriarsinnaanera sammissavaat, sammiuviusussaq kingulleq tassaassaaq igasut sumiiffimmi pissarititaasut atorlugit, soorlu qeqqussat, nutaanik nioqqutissiorsinnaanerat.

Atuaruk: Aningaasarsiutissaq nutaaq aajuna - immaqa

Qeqqussat tunisassiarineqarsinnaanerat siunertaavoq
Mads Thimmerip malillugu isumasioqatigiinnerup siunertaraa peqataasut ilisimasanik attavinnillu avitseqatigiissinnaanerat.

- Siunertaavoq suliffissanik pilersitsisoqarnissaa. Nunarsuup ilaani allami, ilaatigut soqutiginartunik tunisassiorfiusuni najugalinnik, nioqqutissiassanillu tigusisinnaasunik ikinngutitaarnissaq, Mads Thimmer oqarpoq. 

Taamaammat aaqqissuisut nioqqutissiassanik soqutigineqartunik nunani tamalaani ingerlatsinermut misilittagalinnik Islandimiit, Frankrigimiit USA-miillu tikisitsisimapput.

- Qeqqussanut tunngasut annertuumik eqqartorpagut, nunarsuarmilu niuernermi taakkununnga periarfissat.

Amerikamiu iggarissoq peqataassaaq
Daniels Burns, qallunaat neriniartarfianni Nomami, ilaatigut nunarsuarmi neriniartarfiit pitsaanersaattut toqqangaasimasumi, ilinniarsimasoq, maannalu New Yorkimi neriniartarfiutiminik Michelinip ulloriaanik ukiarmi tunineqartoq, isumasioqatigiinnermi peqataassaaq.

Mads Thimmerip oqaluttuaraa Daniel Burnsip nioqqutissiat immikkut piginnaasaqarfigigai, kiisalu tuniniaasartunut amerikkallu avannaani pisisartunut attavigissaartoq.

- Taamaattumik nioqqutissat arlaannik amerikap avannaani niuerfinnut nioqqutissiulersinnaagaanni tamanna pitsaalluinnartuussangaluarpoq, Mads Thimmer Sermitsiaq.AG-mut oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER