Skip to main content

Jens-Erik Kirkegaard qinigassanngorteqqippoq

Takornarialerinerup ineriartortinneqarnissaa Siumumi politikkerimit qineqqusaarutigineqarpoq. Nunarput avataaniit annertuumik aningaasaliiffigineqarnissani avaqqussinnaanngilaa, Jens-Erik Kirkegaard oqarpoq

Inuussutissarsiornermut aatsitassarsiornermullu naalakkersuisuusimasoq Jens-Erik Kirkegaard, Siumut, Inatsisartunut qinersinissamut qinigassanngortippoq. 

Tamanna tusagassiutinut nalunaarutigaa.

Qinigassanngortittut allat assigalugit takornarialerineq ineriartortikkusuppaa. 

- Nunarput ullumikkut pissanganartooreerpoq takornariarfigissallugu, kisianni amingaateqarpoq malunnaatilimmik takornarissat tikittartut amerlatissappata, inuussutissarsiuullu taanna tunisassiat ataatsimut nalingani malunnaateqarlualissappat (bnp). Takorluugaqarpunga Kalaallit Nunaat ukiut arlallit ingerlanerani issittumi takornarissanut pissanganarnerpaallunilu tikikkuminarnerpaassasoq, tusagassiutinut nalunaarummi Jens-Erik Kirkegaard allappoq. 

Taanna takorluugaq assigiinngitsunik pisariaqartittivoq. 

- Pingaarnerit ilaat tassavoq nunarput avataaniit annertuumik aningaasaliiffigineqarnissani avaqqussinnaanngilaa. Attaveqarnikkut aaqqissuussinerit taamaammat tunngaviulluinnartumik inisseqqapput, Inatsisartunut 2013-mi marsimi qinersinermi 156-nit qinerneqartoq oqarpoq. 

Aningaasaliisoqarnissaa pisariaqartoq
Ilulissani mittarfik piaarnerpaamik tallisariaqartoq isumaqarpoq. Avataaniit aningaasaliinikkuinnaq imaluunniit pisortat namminersortullu tassunga aningaasaliissasut siunnersuutigaa. 

Mittarfiup tallineratigut qularutissaanngilaq aningaasaliinerit allat malittaassasut, soorlu unnuisarfiit nutaat.

- Kisianni aamma isumaqarpunga nunarput issittumi takornariarfissatut pitsaanerpaatut inississappat, takornarissanut ornissallugit pilerinartut amerlisittariaqarpagut, pinngortitap pilersitai naammanngillat. Nunatta pisariaqartippaa pilerinartut ornissallugit, inunnik sanaat, Jens-Erik Kirkegaard oqarpoq, nangillunilu:

- Assersuutigalugu tassaasinnaapput Ilulissani sermeq pillugu ilisimatusarfeqarfik, takornarissanut immikkoortortalik. Ilulissani aallaat eqqarsaatigineqarsinnaavoq illorsuup iluani naluttarfik pilukaffittalik. Takorlooraanni iluaniilluni isikkivigalugu arsarnerit qeqertarsuullu tunua. Kujataani eqqarsaatigineqarsinnaavoq nunaqarfittut pisuusartitamik pilersittineq, qangarsuaq qallunaatsiaat, kalaallillumi inooriaasiannik takutittivik.
 
Periarfissat assigiinngitsut
- Ilimanami suliniut, avataaninngaanniik aningaasaliisoqarluni ornissallugu pilerinartuliaq, inunnik sanaajusoq assersuutissatsialaavoq (Realdania aningaasaliisuulluni). Kalaallit Nunaanni nunap immikkoortortai assigiinngitsut tamarmik immikkuullarittunik periarfissaqarput. 

- Una oqariartuutigaara nunatta pisariaqartippaa takornarissatut pilerinartuutigalutik suliffinnik pilersittisinnaasut, akiliilluni iserfissat aningaasanillu atuiffiusut. Taamaasiornikkut malittigisassaata ilagissavaat inuusuttagut  takornariaqarnerup silarsuaani ilinniarusunneq takusinnaagunikku suliffissat ineriartorfiusinnaasut piuppata, Jens-Erik Kirkegaard oqarpoq. 

Takornarialerineq qineqqusaartunit allanit aamma eqqartorneqartareerpoq, soorlu Siumumeersup Bernhardt Olsenip siunnersuutigaa takornarialerinermik ilinniarfik Qaqortumit Ilulissanut nuunneqarnissaa, kiisalu aamma Demokraatit sinnerlugit Inatsisartunut qineqqusaartup Randi Vestergaard Evaldsenip oqaatigigaa takornarialerineq nunatsinni aningaasaqarnikkut pitsanngorsaaqataasinnaasoq oqaatigigaa. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER