Maniitsoq

Aavartup sumiiffeerunneqarsimagaluarnera Maniitsumi politiinit misissorneqassaaq

Niels Skifte Josefsenip isigai qerrussorsimapput Maniitsullu napparsimavianut nuunneqangajalerluni

50-nik ukiulik aavariaq Niels Skifte Josefsen qanoq aamma sooruna tammaaneqartoq? Pinngitsoorneqarsimasinnaagaluarpa?

Maniitsumi politiit apeqqutit taamaattut akerusuppaat, Maniitsumi politiinit Jan Geisler oqarpoq.

- Angut tammaaneqartoq aavariaqataasullu piffissaqalerpata oqaloqatigissavagut. Annertunerusumik pisoq oqaaseqarfigisinnaanngilara, Jan Geisler Sermitsiaq.AG-imut oqarpoq.

Ujaarineqartoq Niels Skifte Josefsen ataasinngormat sissap sinaatigut pisuttoq nassaarineqarpoq.

Atammiup kujataani Niaqunngunami Niels Skifte Josefsen ujarneqalerpoq marlunngornermi oktobarip 14-ani. Ujaasinermi Qeqqani Politiit Sermersuumi politiit, Issittumi Sakkutuut, Air Greenland kiisalu inuit nammineq kajumissutsimik ujaasisut suleqatigaat.

Oqaaseqarsinnaanngikkallartoq
Niels Skifte Josefsenip ikinngutini marluk tuttunniaqatigai. Umiatsiamut apuutinngilaq, tassanngaannit tuttunniaqataasa ujaarilerpaat.

Niels Skifte Josefsen Atammiup peqqissaaveqarfiani uninngasoq isigaalu qerrussimasut KNR paasissutissiivoq. Maniitsup napparsimavianukaanneqassaaq ullup ingerlanerani.

Niels Skifte Josefsenip qasoqqanini pissutigalugu KNR-imut oqaaseqarsinnaasimanngilaq.

Aavartilluni qannilersimavoq sumiiffeerussimallunilu.

Powered by Labrador CMS