Aleqap atornerluinera
Tusagassiortunik katersortitsinermit assit takukkit: Aleqa qinersisitsinianngilaq
Aleqa Hammondip atorsimasani ajornerpaaq pakkerniarsaraa
Naalakkersuisut siulittaasuat tatineqartorujussuaq Aleqa Hammond, Siumut, arfininngormat unnukkut tamanut ammasumik naveersippoq, landskarsip aningaasaataanik piumasaarsorsimasutut Inatsisartut kukkunersiuinermut ataatsimiititaliaanit unnerluutigineqarnermi kingorna.
– Pisortat aningaasaataat nammineq siunertanut sumilluunniit atorneqartassanngillat. Pisimasoq manna erloqinartutut isigaara akisussaaffillu tamakkiisumik tigussavara, taanna aallartippoq.
Tamanna peqatigalugu erseqqissarpaa landskarsimut akiligassaqarunnaarsimalluni. Suullu tamarmik paatsoornermik tunngaveqartut. Assersuutigalugu ilaquttaminut billetsit nammineq inniminnersimanngilai, billetsinilu aqqit arlallit kukkusumik allassimapput.
– Nammineq aningaasartuutikka akilinnginnakkit piaaraluneersimanngilanga. Qularutiginngisaannarsimavara uanga nammineq aningaasartuutigigikka, taanna Nuummi tusagassiortunik katersortitsinermi oqarpoq.
Tamanna tunuliaqutaralugu oqarpoq pisimasoq kinguneqaqqissanngitsoq. Qinersisoqarnissaalu tusarumanngivippaa. Ulloq naallugu illua'tungiliuttut taamatut piumasaqarsimagaluarput. Akerlianik siumut isiginiarpoq.
– Naalakkersuisooqatigiinnermik isumaqatigiissut nutarterneqassaaq, oqartussaaffeqarfiillu ilaat allanngortissavagut. Suliaq tamanna maanna aallartereersimavoq, taanna oqarpoq tamatumunngalu atatillugu Atassutip siulittaasortaava Knud Kristiansen, tusagassiortunik katersortitsinermi aamma najuuttoq, tikilluaqqullugu.
Minibari
Aleqa Hammondip paasitippaa naatsorsuutigalugu tusagassiortut innuttaasullu, Kukkunersiuinermut Ataatsimiititaliap nalunaarusiaani akunnittarfiup minibarianit atuisimanermut immikkoortua immikkut soqutigissagaat.
Sermitsiaq.AG-mit toqqaannartumik aperineqarluni neriorsuivoq bilagit uppernarsaatillu tamanut saqqummiunneqarumaartut.
– Imaanngilarmi atuisorujussuusimasunga. Barimut akiligassarujussuaqanngilanga, taanna oqarpoq, assamminillu usserluni takutillugu korti akiliut qanoq atorneqartartoq.
Arlaleriarluni oqaatigisarpaa Kukkunersiuinermut Ataatsimiititaliap annertunerusumik misissuinissaa tikilluvaqqullugu.
– Tamatta kissaatigaarput inuiaqatigiinni eqqissisimasoqassasoq, taamaattumillu isumaqarpunga misissuineq tamanna pissusissamisoorluinnartoq. Taamatuttaaq tamakkiisumik ataqqivara uannik isornartorsiuisoqarsinnaanera. Naapertuulluinnarpoq ataatsimiititaliap suliani tamaatut suliarimmagu.
Taamaaginnarpoq
Arlaleriarlugu aperineqarpoq sooq ukioq ataaseq sinnerlugu qaangiutereersoq aatsaat 100.000 koruuninik sinnillit akilerneqarsimanersut.
– Taamaaginnarpoq, aallartippoq itisiliillunilu pisimasoq pillugu siumut utimullu attaveqaqatigiittoqartarsimasoq paasiniarlugu sorpiaat akilerneqassanersut.
Taassuma oqaatigaa suliaq aallartitsissimallugu tamatumani malittarisassat qulaajarniarlugit, angalanernut akiliinernullu atatillugu periutsit qularutigineqassanngimmata. Isumaqarporlu Naalakkersuisunut ilaasortat allat tamanna aamma ujartoraat.
– Ersarissunik malittarisassaqarnissaa isumaqatigilluinnarpara, taanna erseqqissaavoq.
Apersortitsineq
Aleqa Hammondip erseqqissarpaa Hans Egedep Illuani apersortittup nalliuttorsiutigineqarnissaanut qinnuteqarsimalluni.
– Tamanna tupinnartortaqanngilaq. Inatsisartunut ilaasortat allat aamma taamaasiortarsimapput, soorluttaaq Inatsisartut Allattoqarfiata illu atortarsimagaa. Suliassap ammalluinnartumik ingerlaqqinnissaa neriorsuutigaa.
– Naalakkersuisuni ammasuunissaq isumaqatigaarput. Maannali pingaaruteqarpoq Kukkunersiuinermut Ataatsimiititaliap sulinermini eqqissisimatinneqarnissaa, inernissaalu utaqqissavara.
Arfininngormat tusagassiortunik katersortitsinermit assit aataani takukkit