Nuuk

Katuami nuannarineqarluartunik tusarnaartitsisoqassaaq

Pamyua aamma Karina Møller Alaskameersut tusarnaartitsissapput, aamma Small Time Giants Qaqortumeersut saqqummersitaminnit erinnat nutaat appissallugit

Small Times Giant
Small Time Giants Katuami tallimanngorpat tusarnaartitsissapput, tassani saqqummersitaminnit nutaamit 'Stethoscope'-mit aamma atugaqassallutik. Saqqummersitaat septembarip ingerlanerani tunisaalissasoq naatsorsuutigineqarpoq

Kulturtikkut illorsuarmi Katuami Nuummiittumi aggustip 29-ani tusarnaartitsisoqassaaq, tassani Pamyua Alaskameersut aamma Qaqortormiut Small Time Giants tusarnaartitsissallutik. Nalunaaqutaq 22.45-mit 02.00-ip tungaanut tusarnaartitsisoqassaaq.

Pamyua tassaapput Yup’it/Inuit nipilersortartut siuaasaminnit kulturikkut kingornussaminnik attassisut, tamannalu nipilersoriaatsimikkut tunngavingalugu. Nipilersoriaaseq atugaat uummaarippoq reggae-nik, soul-inik, jazz-inik, pop-inik funk-inillu nipilersoriaaseqarlutik, tusarnaartitsinissat pillugit Katuaq tusagassiutinut nalunaaruteqarpoq. Karina Møller tassani tusarnaartitseqataassaaq.

Pamyuakkut nipilersuorlutik nunarsuarmi nunani assigiinngitsuni tusarnaartitsisaqattaarlutik angalanikuupput. Nersornaatinik assigiinngitsunik pinnannikuupput, soorlu Native American Music Award (Record of the Year), Aboriginal music award aamma Governor Arts Award.

Small Time Giants nipilersoriaatsimik allaanerusumik pissaganartumik nipilersoriaaseqarput, nunanit allanit malugineqariartuaartoq. Nipilersoqatigiit, EP-rtik Six Shades Of Heart saqqummersinnikuullugu, nunatsinni nunanilu allani tusarnaartitsigaangamik nersualaarneqartaqaat, qularnanngitsumik nukissaqarluartarlutik takutitsilluartaramik.

Nipilersortartut tusarnaartutik ikioqatigalugit crowd funding atorlugu Small Time Giants maanna nuuteeqqamik saqqummersitseqqilerput, septemberimi saqqummernissaanut naatsorsuutigineqartumik. Nuuteeqqap saqqummertussap qulequtarivaa ’Stethoscope’. Saqqummersitsineq una siullerli saqqummermat sulissutigisimavaat.

- Nuuteeraq nipilersuusiortarnitsinni suliaalluarnerpaavoq. Itisilerlugu suliarisimavarput misigalutalu uummaterput, kiagunneq minnerunngitsumillu nipilersuutiliornikkut eqqumiitsuliorneq nipilersugaliatsinnut atorsimallugit. Nipilersukkat saqqummersinnissaannut qilanaarnikuuvugut, nipilersuutit nammineq uumassuseqalerniassammata, Small Time Giantsimi erinarsortoq Miki Jensen oqaluttuarpoq.

Saqqummersitsinissamut atatillugu Katuami tusarnaartitsinissaat isumalluarfigineqaqaaq, augustip 29-iani tusarnaariat siullerpaajullutik nipilersuutit nutaat tusarnaartussaammatigit. Small Time Giants kingorna Kalaallit Nunaata sineriaani, Danmarkimi Europamilu tusarnaartitsisaqattaassapput.

Powered by Labrador CMS