Inatsisartut ataatsimiittarfiat
Pilersaarummik peqartoqareerpoq
Inatsisartut ataatsimiittarfiata pioreersup inaani nutaamik ataatsimiittarfissamut 90 millioner koruunilimmut, Tegnestuen Nuuk pilersaarusioreersimavoq ineriikkamik
Ukiut arfineq-marluk matuma siornatigulli inatsisartut ataatsimiittarfissaannut nutaanut pilersaarusiortoqareersimavoq.
Init pigineqartut annikilliornarpallaaleqimmata 2000-ip aallartinnerani pilersaarusiornissamik suliakkiisoqarsimavoq.
Pilersaarut piviusunngortinneqanngilaq taamanikkut Nuummi sanaartortoqartorujussuummat, kvadratmeterimullu akit qaffasippallaarlutik. Ilaatigut HT-Højgaardip inissiarsuarnik napasulianik sanaartornera, Grønlandsbankip qullersaqarfittaavata Nuuk Centerillu sananeqarnerat pissutigalugu. Aamma taamani Qinngorput sanaartorfiusorujussuanngorsimavoq.
Suliamik ilisimannittut tupigusuutigaat pilersaarut pigineqartoq taanna sooq atorneqarsinnaannginnersoq, Aqqaluks Pladsimili akisunerujussuaremik sanaartorniartoqarluni, Nuummiutoqqat akerlerisaannik. Pilersaarut pioreersoq aamma Nunatta atortussiaataanik sananeqarsinnaavoq. Nuna aningaasassaaleqivoq, innuttaasut arlallit oqarput.
Illussanik titartaasartup Peter Barfoed pilersaarutip taassuma saqqummiuteqqinnissaanik novembarimi qinnuteqartoq akineqarsimananili.