Gert Brask: Tunniutiinnarpunga

"Pilluaritsi tunniutiinnarpunga, maanna akisunerujussuarmik angalaqqissinnaalerpusi". Arfininngormat unnukkut Greenland Express Air-ip pisortaanera pilersitsisualu Gert Brask Facebook-imi taamatut allappoq. Kingorna Sermitsiaq.AG-p Gert Braskimut uppernarsartissinnaasimanngilaa Facebook-imi quppernermini allatani ilumoorunneraa. Paasissutissiinerali aalassatsitsivoq, maannalu apeqqutaalerpoq selskabi, atuisartui suleqatigisaalu qanoq pissanersut.

Aningaasaqarnikkut ajornartorsiutit

2014-imi aasaq Greenland Express Air-imut aallartisarfiusimavoq pitsaanngeqisumik, taassuma Danmarkip, Islandip Nunattalu akornanni siumut utimullu timmisartuussinissami ilarujussui taamaatiinnartarsimallugit. Kingullermik tallimanngormat taamaatitsiinnartoqarpoq, tamannalu pivoq Sermitsiaq.AG-p tamanna peqatigingajallugu oqaluttuarigaa selskabi pilersinneqaqqammersoq aningaasaqarniarnikkut annertuumik ajornartorsiuteqartoq.

Taamaasilluni nunatsinni mittarfinnik atuinermut akitsuut aatsaat akilerneqarpoq Greenland Express Air-ip timmisartua malrunngormat Nunatsinnukarluni aallareersorlu. Aatsaallu oqartussaasut sisamariarlutik akileeqqusillutik kimigiisereersullu, sioorasaarillutik akiligassat akilerneqartinnagit nunatsinni mittarfinni sullissinermik taaneqartartoq ingerlanneqassanngitsoq.

Arfininngormat unnukkut takisuumik nassuiaateqarpoq

Arfininngormat unnukkut Gert Brask Facebook-imi quppernermini takinerusumik nassuiaateqaerpoq, naggataatigullu allallluni tunniutiinnarluni:

"Qanoq oqarneri uppereqinasigit tusatsiakkanillu siammarsaanasi, ilarpassuit ajortisaariniarnerinnaapput, illillu tusatsiakkanik upperinnikkuit allallu pillugit tusatsiakkanik eqqunngitsunik siammarsaallutit taava "ajortunik tusaaniartut" ilagaatsit. Taamatut aserorsarneqarsimavunga Danskinit Kalaallinillu, tamakkualu iluatsitsinnginnissara kissaatigiinnarpaat, inuusuttuullunga kukkuluttorsimagama ullorlu manna tikillugu suli pillarneqarpunga.

Pitsaasumik iliuuseqarniarlunga inuit Kalaallit Nunaannit Kalaallillu Nunaannut billetsinik akikinnerusunik pilersorusussimavakka, Sermitsialli allarpassuillu kukkunikka kisiisa isiginiarpaat ajortisaarillutillu. Pilluaritsi tunniutiinnarpunga, maanna akisunerujussuaermik angalqqissinnaalerpusi".

Quppernermi tassani illersortasa kajumissaarpaat ingerlaannaqqullugu tunniutiinnaqqunagu.

Paasissutissat allanneqarput Gert Braskip Facebook-imi quppernerani matoqqasumi. Tamakkuali atuisartuanut, niunermi attaveqarfiinut inuiaqatigiinnullu avatangiittunut pinngitsooratik pingaaruteqarmata Sermitsiaq.AG isumaqarpoq tamanut saqqummiunneqassasut.

Tamanna peqatigalugu Gert Braskip Facebookimi profilimini assini Jiisusimut sanningasulimmiittumut allanngortissimavaa, takutinniarlugu pilliutigineqarsimalluni. Atuisartorpassuilli eqqarsaatigisimagunanngilai, tamakkua ajornartorsiuteqalermata Greenland Express Air-ip timmisartuussisarnini unitseriataarmagit. Tamanna akikissimanavianngilaq.

"Ilissinnut oqaaseqaateqarusunngilanga"

Sermitsiaq.AG-p sapaatiummat telefonikkut sms-ikkullu Gert Brask attaveqarfiginiaraluarpasa paasiniarlugu oqaatsini aalajangiusimanerai. Tamanna peqatigalugu paaserusullugu assersuutigalugu tamatumuuna Greenland Express Air-ip ingerlateqqinneqarnissaa attorneqaannassanngimmat, aammattaarli ilaasut Kalaallit Nunaani, Islandimi Danmarkimilu ingerlaqqissinnaajunnaarsinnaasut eqqorneqarnerat.

Pisortamit taamaallaat akineqartarpugut "Inuulluarit" aamma "Ilissinnut oqaaseqarusunngilanga".

Taamaattumik ammasumik apeqquterujussuuvoq marlunngorpat Aalborgimit Island aqqusaarlugu timmisartuussinissamik pilersaarutigineqarpoq ingerlanneqassanersoq, imaluunniit ilaasut namminneq akilikkaminnik ingerlaqqittariaqarnersoq.

Sermitsiaq.AG-p tamanna malinnaaffigissavaa.