Grønlandsbankenip sinneqartoorutaa annertusiartorpoq

Grønlandsbanken 2014-mi ukiup affaanut iluanaarutai 78,4 million koruuniupput. Nuummili inuussutissarsiutitigut unittooqqaffiunera, suliffissaaleqinerullu annertusiartuinnarnera ernumagineqarpoq.

Aningaaserivimmi pisortap Martin Kviesgaardip sinneqartoornerit ima nassuiaateqarfigai:

- Aningaasat nalinginik naleqqusaanerit immikkut ittumik iluanaaruteqarfiupput, soorunalumi qujanarlutik, kisianni taarsigassarsisitsinerit amerleriarneri, atuisutsinnillu pitsaasumik qisuariarfigineqarput immikkut nuannaarutissaavoq. Grønlandsbankenimi iluanaarutitta qaffassinnaasimanerannut, atuisugut, sulisugullu eqeersimaartut pisooqataapput, tamatumallu aamma takutippaa akit atortitagut unammillersinnaalluartut.

Grønlandsbanken Aasianni immikkoortortaqarfimmik ammaaqqammerpoq, taarsigassarsisitsisarneq, initaarniarluni taarsigassarsisitsinerit, taarsigassarsisitsinerit allat, qularnaveeqqusiinerillu, inuussutissarsiutinik ingerlatalinnut periarfissiisoqarluni.

Nuummi inuussutissarsiorneq
- Sinerissami immikkoortortani, eqeersimaartumik, ajornanngitsumillu siunnersuisarnerit immikkut iliuuseqarfigineri, uatsinnut iluaqutaasimapput. Taama iliornitsigut, atuisut pitsaanerusumik sullinneqalersimapput – tamannalu aamma niuernikkut uatsinnut iluaqutaasimaqaaq. Sinerissami atuisugut amerliartuinnartut takutissinnaasimavagut, qanoq atorsinnaaneraatigut aammalu ilaqutariit ataatsiakkaat qanoq ikiorsinnaanerigut. Aamma sulisoqarpugut, atuisutsinnik pitsaasumik attaveqarnitsinnik pimoorussillutik sulisunik. Ukiup aaffaata siulliup ingerlanerani ataatsimiigiaqqusinerit 1.000-it sinnillit nassiussimavagut.Taama iliuuseqartarnerput atuisut nuannaarutigisarpaat, naatsorsuutitigullu tamanna aamma iluaqutaalluni, Martin Kviesgaard naliliivoq.

Nuummi pissutsit uninnganerat ernumanartinneqarpoq. Kalaallit Nunaata aningaasaqarnera ataatsimut isigalugu pitsaasumik ingerlanngitsoq oqaatigineqarpoq.

- Aningaasarsiornerup ukiuni kingullerni inissisimanera pitsaanngilaq, ingammik Nuummi inuussutissarsiutinik ingerlatallit tamanna malugisimavaat, aammalu Kalaallit Nunaanni tamarmi suliffissaaleqisut piffissami sivisungaatsiartumi amerliartuinnarsimallutik. Pisariaqarpoq politikerit partiit apeqqutaatinnagit, inuussutissarsiutinillu ingerlataqartut suleqatigalugit iluaqutaasunik suliuniuteqarnissaat, Martin Kviesgaard oqarpoq.

Grønlandsbankeni 2014-mi 125-145 million koruuninik sinneqartoornissaa naatsorsuutigineqarpoq.