ajunaarneq
Politiit: Ajunaartoqarnerani aalisartut ikiuulluaqaat
Sapaammi Uummannami alianartumik ajunaartoqarnerata kinguninngua inunnik isumaginnittoqarfik saaffigineqarpoq
Uummannaq 1.200-ut sinnerlugit inoqartoq sapaammi inuit pingasut ajunaarnerannit pingasullu annannerannit assut eqqungaavoq. Annaassiniarnermi aalisartut ikiuuttut sakkortuumik misigisaqartut utoqqaat pingasut uummarsarneqaraluarneranni iluatsinngitsumi ikiorserneqarput.
Atuaruk: Ajunaarneq: Utoqqaat pingasut ajunaarput
Umiatsiaaraq arfinilinnik inuttaqarluni sapaammi ualikkut Uummannap eqqaani ajutoormat kalerriisoqarnerani politeeq Jens Thorin nalunaarummik tigusisuuvoq.
Atuaruk: Uummannap eqqaani inuit pingasut ajunaarput - pingasut annaanneqarput
- Qujanartumik umiatsiaatilik illoqarfiup kitaani umiatsialivilik ikiortigaara. Taassuma umiatsialivianit ajutoorfiusoq 2 kilometeri missaliuinnarlugu ungasissuseqarpoq nunamiillu 100 meterinik ungasitsigaluni, Jens Thorin Sermitsiaq.AG-mut oqaluttuarpoq.
Misigisaq sakkortuvoq
Inuit arfinillit umiatsiami ilaasut tamarmik imaanut ingeriussaasimapput politiinillu aalisartunillu ornigukkasuartunit qaqinneqarlutik.
- Qaqinneqarmata ingerlaannaq ikiueqqaarneq aallartipparput. Qujanartumik niviarsiaraq qulinik ukiulik uummartipparput ajoraluartumilli allat pingasut uummarteqqissinnaasimanagit, Jens Thorin oqarpoq.
Annattut ajunaartullu ernerlugit Uummannamut pissunneqarput.
- Uummannamut tikikkatta ingerlaannaq inunnik isumaginnittoqarfik attavigaarput. Qularnanngilaq aalisartunut ikiuuttunut misigisaq sakkortuvoq taamaattumillu tupaqqanermi arlaatigut ikiorserneqartariaqarlutik, Jens Thorinnoqarpoq.
Umiatsiaaqqat sikumut apornermini ajutorsimanissaa ilimagineqarpoq taamaasimmallu ilaasut tamarmik imaanut ingeriussaasimallutik.
- Ajutoornermi aalisartut ikiuuttut assorujussuaq qujassuteqarfigerusuppagut, Jens Thorin naggasiivoq.