Skip to main content

Greenland Cruises: Umiarsuit ilaat Nunatsinni najugaqartunik takornarialerisoqarneq ajorput

- Nunatsinni najugaqartunik takornarialerisoqartarnissaa pingaartittarpara, Greenland Cruisesimi piginnittoq Ivik Knudsen-Ostermann oqarpoq

Umiarsuaq takornariartaat MS Delphin Nuummiimmat umiarsuup takornarialerisui Nuuk pillugu ilisimasaqarnerpaanngitsut Sermitsiaq.AG-mi marlunngornermi allaaserineqarpoq. 

Sermitsiaq.AG-mi sulisup ilaata ilaatigut tusaavaa takornarialerisup takornarialereqatini apererpallakkaa Sassumap Arnaa Qungussutariannguamut assilisaanersoq. Aamma napparsimavitoqaq Inatsisartut ataatsimiittarfigisimagaat takornarialerisunut nassuiaanneqarpaluttoq, kiisalu Annaassisitta oqaluffia atorunnaarsimasoq aamma nassuiaanneqarpaluttoq tusaaneqarluni. 

Ivik Knudsen-Ostermann, Greenland Cruisesimut piginnittuusoq oqaluttuarpoq umiarsuaq MS Delphin arlaleriarluni Nuummiittareersoq, takornarialerisullu Nunatsinni najugaqartut aamma siornatigut atorneqartarsimasut oqarluni. 

Umiarsuup naatsorsuutigisimanngikkaluarpaa Nuuliassanerluni ukioq manna, Qaqortumili sikorsuaqarpallaarnera pissutaalluni Nuummukaannarsimalluni. 

Greenland Cruises: Soorunami uggornarpoq
- Ivik Knudsen-Ostermann, takornarialerisut illoqarfimmik ilisimasaqarpallaannginnerat qanoq isumaqarfigaajuk?

- Soorunami uggornarpoq allaaserisanik taamaattunik atuassalluni, takornarissanummi sullissisuuvugut, misigisaqarluarnissaallu anguniartuarlugu. Umiarsuilli ilaat Nunatsinni najugaqartunik takornarissanik sulisoqaneq ajorput, aningaasaqarneq pissutaalluni, ilaallu aamma angalaartitserisuttarnatik. Taamaattumik umiarsuarmi takornarialerisut ilaat siullerpaamik Nunatsinniinnerminni takornarialerisarput, ilaallu aamma umiarsuni sulisut - soorlu saqisut - nunamukaraangamik takornarialerisuutinneqartarlutik. 

- Greenland Cruisep umiarsuit ilisimasaqartunik takornarialerisoqartarnissaat piumasaqaatigisarpaat?

- Neriuutigiusuaannarpara takornarialerisut Nunatsinni najugaqartuunissaat, suminngaanneerneri apeqqutaatinnagit. Paasissutissanik tunniussisinnaanissaat pingaartittarpara, soorlu illoqarfiup oqaluttuassartaata ilisimasaqarfiginissaa pingaaruteqartarluni. Takornarissalli aamma allanik paasisassanik apersuisarput, soorlu illoqarfimmiiffigisami inuuneq qanoq ittuunersoq paaserusunneqartarpoq, peroriartorneq atugassarititaasullu. Takornarissat apersuutiginerusarpaat qanoq innersoq najugaqarfigissallugu illoqarfik, taava aamma uanga nammineq inuuninnit oqaluttuartarlunga, Ivik Knudsen-Ostermann oqaluttuarpoq. 

Takornarialerisut
- Suut tamarmik pitsaanerpaamik ingerlasuuppata takornarialerisut tamarmik kalaaliusimassagaluarput Nunatsinni najugaqartut, piviusorli taamaanngilaq. Takornarialerisut qaammatini pingasuni atortarpakka. Ukioq kaajallallugu takornarialerisunik atorfinititsisinnaanngilanga kisimi aasaanerusumi takornariaqartarnera pissutaalluni. Taamaattumik sulinngiffeqartut takornarialerisutut atortarpakka. Aamma tyskit amerlasuut takornariaasarput, taamaattumik takornarialerisut tuluttoorsinnaasariaqartarlutik minnerpaamik. Ilaanni takornarialererusukkaluartut itigartinneqartarput tuluttoorsinnaannginneri pissutaallutik. 

- Saniatigooralugu takornarialerisuusartut Sisimiuni 20-upput, affai kalaaliullutik. Tyskisut oqaluttut Nunatsinnut nuunnikuusuupput. Taakku atorfissaqartittartorujussuuakka. Takornarialerisut tamaasa pingaarutilerujussuupput, taakkoqarsimanngitsuuppat Greenland Cruise ingerlasimasinnaasimassanngikkaluarpoq. 

- Namminersorlutik Oqartussat immaqa takornarialerisunik amerlanerusunik ilinniartitsisinnaagaluarpoq. Qaqortumi assigiinngitsunik periarfissaqarpoq, serviceøkonomitut kiisalu aamma immikkut takornarialerinermik ilinniarfeqarluni. Ilinniarnikuusunik sulisoqartarpunga, Ivik Knudsen-Ostermann oqaluttuarpoq, kiisalu oqaatigalugu ukiorpassuarni takornarialerisarneq eqqartorneqartartatoq eqqartorneqartuassasorlu. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER