Immikkut ittumik pisassiineq
Ukioq manna qaleralittassat amerlineqarput
Angallatinut 6 meterit sinnerlugit angissusilinnut pisassat Naalakkersuisut amerleqqammerpaat. Ataatsimut isigalugu biologit inassuteqaataat qaangerneqarput
Naalakkersuisut aalajangerput ingerlatsivinni Uummannami Upernavimmilu angallatit qaleralinniartut 2013-ip naalernerani pisassiissutit amerlaqataannik pisassinneqassasut.
Tassa imaappoq, pisassat 894 tonsinik amerlineqarput. Taamaasilluni 2014-imi angallatinut pisassiissutit katillugit 11.577 tonsinngorput.
Angallatinut pisassiissutit pisassanit pisassat malillugit agguarneqassapput, pisassallu amerlissutaat angallataatilinnut toqqaannartumik nalunaarutigineqassapput. Tamatuma kingorna ingerlatsivinni pingasunmi pisassiissutit tamarmiusut katillugit 26.394 tonsinngorput, angallatinut katillugit 11.577 tonsit, umiatsiaararsortunullu katillugit 14.817 tonsit.
Ingerlatsivimmi Qeqertarsuup Tunuani angallataatilinnut 2014-imi pisassiissutit 2013-imi pisassiissutitut amerlassuseqarput, taamaattumillu immikkut nalilerneqassanatik.
Naalakkersuisut nalunngilaat ingerlatsivinni pineqartuni qaleralittassiissutit biologit inassuteqaataannit amerlanerulersut. Naalakkersuisut ilanngullugu aalajangiipput ingerlatsivinni pingasuni pineqartuni 2014-imi pisassanik amerlisitsisoqaqqissanngitsoq.