tusarnaartitsineq

Kalaallit nipilersortartut Københavnimi katersuiniassasut

Københavnimi katersuiniarluni nipilersornermi Small Time Giants aamma Aviaja Lumholt tallimanngorpat tusarnaartitsissapput

Københavnimi tallimanngorpat ilaatigut tusarnaartitsissapput Small Time Giants

Piorsarsimassutsikkut Inuusuttunut Peqatigiiffik pilersinneqaqqammersoq tallimanngorpat Københvanimi Nørrebromi Stengademi katersuiniarlutik tusarnaartitsissapput.

Kalaallit nipilersortartut tusarnaartitsissapput, ilaatigut Small Time Giants aamma Aviaja Lumholt tusarnaartitsissallutik. Katersuiniarluni tusarnaartitsineq nalunaaqutaq 17.00-imit 01.00-ip tungaanut ingerlanneqassaaq.

Katersuiniarnermi aningaasat isertinneqartut sumut atorneqassappat?

- Akeqanngitsumik sunngiffimmi Kalaallit Nunaanni meeqqat inuusuttullu sammisaqartalernissaat peqatigiiffiup anguniarpaa. Aningaasat atuanngiffeqarnerani nipilersornermik sungiusarfimmik atorneqarsinnaassasut neriuutigaarput. Anguniarneqarpoq nunatta kujataani nipilersornermik sungiusartoqarsinnaassasoq sapaatip akunnerini marlunni. Taanna Qaqortumi ingerlanneqarnissaa siunertarineqarpoq. Peqataasut nipilersornermik sungiusartinneqassapput, kisimiilluni suleqatigiinnermilu sungiusaasoqassalluni. Taanna pereeriarpat innuttaasunut tusarnaartitsinissamut periarfissinneqassapput, Sina Parbst Frederiksen Sermitsiaq.AG-mut nassuiaavoq.

Peqatigiiffik Qaqortumiittuuvoq Ivalo Parbst Frederiksen siulittaasuulluni Jakob Søvndahl Skovaalu siulittaasup tulliulluni.

Tallimanngorpat maajip 23-ani katersuiniartoqassaaq:

  • Piffissaq: Nalunaaqutaq 17.00-imit 01.00-ip tungaanut
  • Tusarnaartitsiffissaq: Spillestedet Stengade, Stengade 18, 2200 København N
  • Iserneq: 60 koruuni
Powered by Labrador CMS