Skip to main content

Silap pissusaa immallu sikua pillugit Qaanaami innuttaasunik ataatsimiititsinissaq

Silap pissusaata imaatalu sikusarnerata allanngornerisa, Qaanaami innutttaasunut, taakkualu ulluinnarni inuunerannut sunniuteqarneri pillugit, Qaanaami innuttaasut ataatsimeeqataanissaminnut matumuuna aggersarneqarput

Namminersorlutik Oqartussanit, ICC-mit kiisalu Nunarsuarmi Pinngortitaq pillugu Aningaasaateqarfik / WWF Verdensnaturfonden-imiit aallartitat, ilisimasallit allat ikittunnguit peqatigalugit apriilip 30-anniit sapaatip akunneranik sivisussusilimmik Qaanaamut tikeraassapput. 
Imaata sikusarneranit minnerunngitsumik aalisartut piniartullu, aammali innuttaasut allat, qanoq sunnerneqarnerannit paasissutissat katersornissaat tikeraarnissami siunertaavoq. 

Tamanna aallaavigalugu, maajip 4-ni nal. 13.00-miit 17.00-mut Qaanaami Avanersuup Atuarfiani isumasioqatigiissitsisoqassaaq. 

- Silap pissusaata allangoriartornerannit aalisartut piniartullu aammali innuttaasut allat nalinginnaasumik qanoq sunnerneqarnerat pillugu assut paasisaqarnerorusuppugut. Qaanaap eqqaani avannaanilu siunissami sikusartuaannarnissaa ilimagineqartoq ilisimavarput. Sukkasuumilli annertuumik allanngoriartortoqarmat, ilisimasat sapinngisamik amerlanerpaat katersorneqarunik iluaqutaasinnaanerussapput, Nunarsuarmi Pinngortitaq pillugu Aningaasaateqarfik / WWF Verdensnaturfonden-imiit, Mette Frost tusagassiutinut nalunaarummi oqarpoq.

Sikup pingaaruteqassusaa
Imaata sikusarnerata allannguutai taakkorpiaapput WWF-ip suliariniakkamini ’Last Ice Area’-mi sammisai. Suliariniakkami tassani, inuit uumasullu imaata sikuanik pinngitsuuisinnaanngitsut siunissami qanoq qulakkeeriffigineqarsinnaanerat immikkut sammienqarpoq.  

Suliariniagaq ukiuni marlussunni ingerlanneqareerpoq. Suliariniakkami aamma Nunavut ilanngunneqarmat, WWF siorna Iqalunni isumasioqatigiissitsivoq. Isumasioqatigiinnermi tassani piniartoq Qaanaameersoq aamma peqataavoq. Silap pissusaata allanngoriartorneranit ullumikkut sunnerneqalereersut takusarlugit, 2012-imi WWF-imeersut Qaanaaq, Savissivik kisialu Kullorsuaq imaatigut angallammik aqqusaarpaat.  

- Tamaani najugallit najugaqarfimminni siunissami qanoq iliuuseqartoqarnissaa pillugu namminneq aalajangiinissaat pingaartorujussuartut isigaarput. Taamaammat qanoq ineriartortitsisoqarnissaa aammali qanoq ileqqutoqqat naapertorlugit inooriaatsip kulturillu qanoq isiorluni illersorneqarsinnaanerat tusarusupparput, Mette Frost oqarpoq. 

Nunarsuarmi Pinngortitaq pillugu Aningaasaateqarfik / WWF Verdensnaturfonden-imiit aalllartitat saniatigut Josef Tuusi Motzfeldt, ilinniartoq Maria Suersaq, siorna Kalaallit Nunaanni Nunavut-milu ilisimasassarsiornermut ’Student on Ice’-imut peqataasoq, Namminersorlutik Oqartussat aallartitaat kiisalu Inuit Issittormiut Siunnersuisoqatigiiffiannit ICC Greenlandimit aallartitaq, Ababsi Lyberth, Pikialasorsuaq pillugu ICC sinnerlugu isumasioqatigiissitsisussaq peqataassapput. 

Peqataassappullu...
Sapaatip akunnerata ingerlanerani angalaqatigiit atuarfimmi atuartut pulaassavaat. 

Tikeraarnerup nalaani Qaanaami najugallit aamma silap pissusaata allanngoriartornera qanoq misigisaqarfiginerlugu filmiliaritillutik oqaluttuarisinnaassavaat. Inuimmi oqaluttuarisaannik immiussinissamut soqutigisalimmik WWF tusagassiortumik peqataatitaqassaaq. Tamatumannga soqutiginnikkuit uunga allagaqarsinnaavutit: r.langhoff@wwf.dk.  

’Last Ice Area’ pillugu uani paasissutissanik pisoqarsinnaavoq: wwf.dk/kal (kalaallisut) imaluunniit wwf.dk/lasticearea (qallunaatut).

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER