sumiiffimmi
Qaanaaq ilaqutariinnut centereqalerpoq
Qaanaami ilaqutariinnut centerip ammarneratigut siunissaq pitsaanerusoq isumalluarfigineqalerpoq. Meeqqat inissinneqartarnerannut Qaasuitsup Kommuniata ukiumut 7,4 millioner koruunit atortarpai
Qaanaami meeqqat inuusuttullu amerlavallaartut sumiginnagaasarput nunaqarfimmillu ungasissumut inissinneqartarlutik. Tamanna kommunimut akisusimavoq. Illoqarfinnguami tassani meeqqat atugarliortut inissinneqartarnerannut Qaasuitsup Kommuniata ukiumut 7,4 millioner koruunit atortarpai. Ajornartorsiutit ilaatigut pissuteqarput ilaqutariinni ajornartorsiutit oqartussaasut piffssaatillugu paasineq ajormatigit. Aningaasartuutilli taama amerlatiginerannut Qaanaap ungasissumi inissisimanera pissutaaqataavoq, tassa meeqqat illoqarfinni allani ilaqutariinnut børnehjemmimulluunniit inissinneqartarmata.
Tamannali ilaqutariinnut centerimik nutaamik ikiorserneqassaaq. Tassani sumiiffimmi ilaqutariit meerartallit atugarliortut ikiorserneqartassapput.
– Meeqqanik, inuusuttunik, ilaqutariinnik pinaveersaartitsinermillu sammisaqarfiit kommunip pitrsanngorsarniarlugit sulissuteqarpoq. Meeqqat børnehjemminut inissittarnerannut millionerpassuit atortarpavut. Aammattaarli sammisaraarput angajoqqaat ikiorneqarnissaat, ilaatigut imigassamik atornerluinerannik. Kingorna angajoqqaat suleqatigisarpavut, qitornaasa angerlarteqqinnissaat siunertaralugu, Qaasuitsup Kommuniani Meeqqanut, Inuusuttunut, Ilaqutariinnut Pinaveersaartitsinermillu sammisaqarfimmi pisortaq Johanne Olsen oqarpoq.
Taanna Qaanaamiippoq ilaqutariinnut centerip ammarneqarneranut atatillugu, oqarporlu ilaqutariinnut centeri innuttaasut nuannaarutigigaat, siunissamilu anguniagaasoq sapaatit akunnerisa naaneranni ulloq unnuarlu ammasarnissaa. Centerimi pisortatut atorfinitsinneqarsimavoq Ivalo Amassen, socialrådgiveritut naammasseqqammersoq, tamatumalu saniatigut Ane Qujaukitsoq atornerluisunut siunnersortitut atorfinitsitaasimavoq.
– Aallaqqaammut ilaqutariit meerartallit kommunimit innersuunneqartut sullisissavagut. Qaanaami ilaqutariinnut centeri atorfissaqartinneqartorujussuuvoq. Neriuutigaarput periarfissaq tamanna meeqqanut, inuusuttunut angajoqqaavinullu siunissami pitsaanerusumik atugassaqalersitsissasoq, Ivalo Amassen oqarpoq.
Ilaqutariit centeriat apriilip 8-anni ammarneqarpoq.