pinngortitaq avatangiisillu
Nalunaarusiortoqareersoq - Greenpeace aqqutissanik nutaanik ujartuisoq
Kalaallit Nunaanni inuussutissarsiornerup ukiuni tulliuttuni qulini ineriartornissaa pillugu Rambøll-ip nalunaarusiani tallimanngorpat saqqummiutissavaa. Tassani Greenpeace peqataassaaq
Rambøll-ip nalunaarusiaa 'Qanoq ineriartortitsisoqarsinnaava - Kalaallit Nunaannu inuussutissarsiornermut ineriariartorfiusinnaasut sianigisassallu 2025-ip tungaanut' siunersorteqarfiup suliaa qaammatini kingullerni Greenpeacemut suliaasoq tallimanngornermi saqqummiunneqassaaq.
Greenpeace Rambøll-ilu innuttaasunik aggersaavoq tassani Katuami Nuummi nalunaarusiaq pillugu oqallittoqassalluni. Oqallinneq nalunaaqutaq 16.30-mit 18.00-ip tungaanut ingerlanneqassaaq. Oqallinnermi sammineqassaaq qanoq inuussutissarsiornermik ingerlataqartut siuarsaaffigineqarsinnaanersut 2025-ip tungaanut, tassanilu peqataassapput Vittus Qujaukitsoq Siumut, Naaja Nathanielsen IA kiisalu Knud Kristiansen Atassut.
Inuussutissarsiornermik ingerlatsinermi ineriartuutaasussat qanoq atorluarneqarsinnaanersut oqallinnermi aamma peqataatinneqassaaq, tassani suliffissat, atugarissaarneq, pinngortitamut avatangiisinullu inniminniineq ilaatigut oqallisigineqassallutik.
- Aperineqartuarpunga Greenpeace Kalaallit Nunaata avatangiisaa takutisassiaannartut isigineraa kiisalu Greenpeace kalaallit ineriartorneranut kinguarsaasuuginnannginnersut. Taakku oqariartaatsit amerlasooriarluni uagutsinnut oqaatigineqartarput ajoraluartumik, aatsitassarsiornissamut uuliasiornissamullu isornartorsiuisuunerput pissutigalugu. Ilaatigut malunnartarpoq taakkununnga isornartorsiuisuugaanni Kalaallit Nunaata ineriartornissaanut kinguarsaasutut isigineqalersartut, Greenpeacep Issittoq pillugu akisussaasuutitaa Jon Burgwald isummersornermini oqarpoq. Isummersuutaata sinnera nalunaarusiamut tunngasoq uani (qallunaatuinnaq allaqqavoq) atuarneqarsinnaavoq.