Skip to main content

Royal Arctic Line 2013-imi amigartooruteqarpoq

Usit assartortakkat annertuumik annikilleriarnerisa kingunerisaanik umiarsuaatileqatigiit 1995-imiilli aatsaat siullermeerlutik amigartooruteqarput

Kalaallit Nunaanni ingerlanerliulernera nunap umiarsuaatileqatigiianut annertuumik eqquivoq. Usit assartorneqartut katillugit 9,1 procentimik appariarnerata kingunerivaa kaaviiaartitsinerup 50 millionit koruunit sinnerlugit appariarnera. Tamanna naatsorsuutini annertuumik malunnarpoq, taakku inerneraat amigartoorutit akileraaruteqareernermi 14 millionit koruunit. 
 
- Naatsorsuutitigut angusat naammaginanngillat, kisianni usit assartortakkat ikileriartornerisa tamanna allaqqutsissinnaanngilaa. Ukiup ingerlanerani suliffeqarfiup aningaasartuutini malunnaateqarluartumik annikillisarpai, kisianni Royal Arctic Line pisussaaffeqarmat angalassalluni sullissineq aalajangersimasoq malillugu usit qanoq amerlatiginerat apeqqutaatinnagu, taava assartuisinnaanermut atortussat annertuut pisariaqartinneqarput tamatumalu kingunerisaanik aningaasartuutit aalajangersimasut. Ukiup 2013-ip takutippa suliffeqarfimmut, usit assartortakkat annikilligaangata, tamatuma qanoq sunniutilertortartiginera, tassami assartuisinnaanermut atortussat piffissaq sivikitsuinnaq eqqarsaatigalugu naleqqussarneqarsinnaanngillat, Royal Arctic Line A/S-imi siulersuisunut siulittaasoq Martha Labansen oqarpoq.
 
Katillugit usit assartukkat Kalaallit Nunaannut aamma tamaanngaannit nunamilu namminermi 2013-imi 750.000 kubikmeteriupput, 2012-imut naleqqiussilluni 830.000 kubikmeteriusut. Usit sananermit aamma sanaartornermut tunngasuteqartut ingammik katillugit ikileriaatinut pissutaapput. Sanaartornermut usit pingaarnerit marluk, usit immikkut ittut aamma usit annertuut appariaarteqarput 29 procentimik aamma 62 procentimik tassa 2012-imut sanilliussilluni. 

Ukiumi pineqartumi naatsorsuutitigut angusat 
Royal Arctic Linep suliffeqarfissuartut naatsorsuutitigut 2013-imi angusaasa takutippaat akileraaruteqannginnermi aamma ikinnerussuteqarluni piginneqataassutini pissarsiassaat akilinnginneranni amigartoorutit 20 millionit koruunit missaanniipput, kiisalu akileraarutit akilereerlugit 14 millionit koruuniullutik, 2012-imut sanilliussilluni akileraaruteqannginnermi 7 millionit koruunit kiisalu akileraaruteqareernermi 6 millionit koruunit.

 Ineriartornermut pitsaanngitsumut pissutaanerpaapput usit assartortakkat malunnaateqarluartumik ikileriarsimanerat kiisalu tamatuma malitsigisaanik kaaviiaartitsinerup annikillinera. Isertitat katillugit 2012-imi 864 millionit koruuninit, 2013-imi 785 millionit koruunit missaannut, ikileriaatit 79 millionit koruunit. Uuliamut tapi aamma nunat allat aningaasaa nikerartarnerannut iluarsissutit ilaatinnagit, isertitat appariaataat 59 millionit koruuniupput.
Aningaasartuutit katitllugit 2012-imi 804 millionit koruuniniit, 2013-imi 754 millionit koruuninut appariarput, ikileriaat 50 millionit koruunit. Orsussamut aningaasartuutit ilaatinnagit aningaasartuutit ikileriaataat 33 millionit koruunit missaanniipput. Aningaasartuutit ikileriarnerannut pissutaanerpaajupput suni tamani ataqatigiittumik pitsanngorsaanerit aamma sipaarniuteqarnerit, kisianni aammattaaq ingerlatsinerit annikinnerulernerisa kingunerannik.

Agguagarsiat
Naak ukiumi pineqartumi 2013-imi naatsorsuutitigut angusat naammaginanngikkaluartoq, inassutigineqarpoq piginnittut, Namminersorlutik Oqartussat kissaateqarnerat tunngavigalugu, agguagarsiassat 25 millionit koruunit akilerneqarnissaat.

- Royal Arctic Linemit assut soqutigineqarpoq containerinut Nuummi termilamik sanasoqarnissat taamaaliornikkut nuna tamakkerlugu assartuineq pitsanngorsarniarlugu. Umiarsualivimmik ingerlatsivimmut nutaamut Sikuki Nuuk Harbourimut Royal Arctic Line piginneqataasunut ilaatinneqanngilaq, naak tamanna eqqarsaatigineqarsimagaluartoq. Tamannalu uagutsinnut ajunngilaq. Terminali umiarsuaatileqatigiit ineriartornerannut pingaaruteqarpoq, taamaattumik Royal Arctic Linemit agguagarsititsinissamik siunnersuutigineqartup aamma umiarsualivimmik ingerlatsivimmut aningaasaliissuteqarnerup ataqatigiinnerat takusinnaavarput. Taamaattumik inassutigineqarpoq agguagarsiassat akilerneqarnissaat, naak tamatumunnga naatsorsuutitigut angusat tunngavigineqarsinnaanngikkaluartut, Martha Labansen oqarpoq nangillunilu:

- Royal Arctic Linemit naatsorsuutigineqarpoq ukiumi aggersumi usit assartorneqartartut killilimmik ineriartornissaat, tassa Kalaallit Nunaanni annertusiartortitsinermut 2014-imi annertunnginnissaa naatsorsuutigineqarmat. Tamassuma saniatigut ukiuni aggersuni annertuumik pisariaqartumillu umiarsuarnut nutaanut aamma containerinut umiarsualivimmut nutaamut aningaasaliissuteqartoqarnissaa naatsorsuutigineqarpoq, taamaattumillu Naalakkersuisut assartuinermut akigitinneqartut qaffannissaat akuersissutigisimavaat 1. marsi 2014 aallarnerfigalugu 5 procentimik.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER