Tuusi: Kalaallit Nunaanni naleqassuseq amigaatigineqarpoq, Aleqa

- Naalakkersuisut Siumumit aqunneqartut isumanik pigiliutiinnakkanik suleriaaseqarlutik inuiaqatigiinnik sullissinerat tupigaara. Isumanik pigiliutiinnakkanik sullissinerat Naalakkersuisut suliaanni takuneqarsinnaapput. Pissaaneqarusunnerup pianik nunami pitsaasumik pilersitserusunneq takorluukkallu pitsaasut annaaneqarsimanerput?

Inatsisartuni siulittaasuusimasoq Josef Motzfeldt danskit aviisiannut Informationimut oqarpoq.

- Siunissamut qaamasumik siunerfeqartunik Naalakkersuisuusinnaasunik amigaateqarpunga. Ataqatigiinnermut nukittorsaasinnaasunik pilersitserusunnermillu takorluuilersitsisinnaasunik aqutsisunik amigaateqartoqarpoq. Naalakkersuisut anguniakkaminnik aallussisunik aqutsisoqarnissaa pisariaqartinneqarpoq, Inuit Ataqatigiit sinnerlugit Inatsisartunut ilaasortaasimasoq oqarpoq.

Naalakkersuisut kajumissaarpai
Josef Motzfeldtip Informationimi allakkamini qulequtsersimasamini 'Kalaallit Nunaanni naleqassuseq amigaatigineqarpoq, saammaasseqatigiiffiusumik ataatsimiisitalianik amigaateqartoqanngilaq'-mi ilaatigut aamma ima allappoq.

- Qanoq nanertugaatiginerput qiassutigiinnarnagu, aningaasallu saammaasseqatigiinnissamut 10 million koruunit allamut atorneqarsinnaagaluit aningaasaliisoqarpoq. Pitsaanerusimassagaluarpoq aningaasat kulturimut eqqumiitsuliornermullu atorneqarsimasuuppata, tassani Kalaallit Nunaanni naleqartitat saqqummiunneqarsinnaagaluarput.

- Aningaasanut inatsit 2014-moortumi ilaatigut takuneqarsinnaavoq ukiuni pingasuni tulliuttuni 2,4 million koruunit saammaasseqatigiinnissamut ataatsimiisitalianut tunniunneqartassasut. Katillugit 9,4 million koruunit tassunga atorneqassapput. Naluneqarporli ataatsimiisitaliarsuarmi qanoq suleriuseqartoqassanersoq, kikkut tassani sulisinneqassanersut, tassani sulineq qanoq sivisutigisumik atorneqassanersoq, kiisalu suliap naammassinerani naluneqarpoq paasisat sumut atorneqassanersut.