tusarnaartitsineq
Qaaq appeqqilerput
Per Berthelsenip nipilersoqatigiivi nuannarisaaqisut Qaaq kulturip illorsuata Katuaq Paarlersuani tusarnaartitsissamaalerput
Kulturip illorsuani Katuami aliannaartoqassaaq februarip 28-at aamma martsip aallaqqaataani nipilersoqatigiit Qaaq tusarnaartitsilerpata. Sumekkut nipilersukaat kissassaatigineqassapput Qaakkut qaqinnginneranni Sume Tribute Band nipilersummata.
Ukioq ataasinngulerpoq nipilersoqatigiit Qaaaq nuannarisaaqisumik tusarnaartitsimmata. Nuannarisaanerat qularutissaanngilaq Katuami Hans Lyngep inersuani pingasoriarlutik tusarnaartitsineri tamarmik ulikkaavittarmata. Erinarsuutit soorlu ’Timmissatut ilillunga’ tusarnaariat nikuillutik erinarsoqataaffigisarpaat.
Tivolimi tusarnaartitsineq
Qaakkut saqqummersitaat tassaavoq qatanngutigiit Per Berthelsenip aamma Birthe Olsenip marluullutik saqqummersitaanni kingulliup tullia. Suleqatigiinneq kipivoq Birthe Olsen suli inuusoqaluni nappaassuaq kræfti pissutigalugu toqukkut qimagummat.
Qaakkut aamma atortarpaat nappaassuaq kræfti pillugu Per Berthelsenip erinarsuusiaa ’Neriuut’ taannalu appinneqaraangat misigissutsit sakkortuut tusarnaartut aqqusaartarpaat.
Qaaq Tivolimi aggustip aallaqqaataani nipilersoriaqqusaapput. Nipilersoqatigiilli angalanissartik nammineq akilertussaavaat. Taamaammat kulturip illorsua Katuaq suleqatigalugu katersuiniarput. Tamannalu tassa pissaaq februarip 28-ni aamma martsip aallaqqaatani tusarnaartitsinerni, Katuaq nalunaarpoq.