Skip to main content

Minik Dahl Høegh peqataasinnaanani nalunaarpoq

Akutaaneq Kreutzmannip peqataanissaa aamma nalornissutigineqalerpoq

Pan amerikami pissartanngorniunnissamut anngunniunnissami Kalaallit Nunaata assammik arsartartuisa angutitaat peqataassapput. Kalaallit arsartuini pikkorinnerit tamaasa peqataassasuuppata angusarissaarluartoqarsinnaagaluarpoq.

Anngunniunneq Mexicop illoqarfiisa pingaarnersaanni Mexico City-mi ingerlanneqartussami nunat tallimat peqataaffigisaanni sisamat ingerlaqqissapput. Pan amerikami pissartanngorniunneq juunimi Uruguayimi ingerlanneqassaaq. 

Kalaallilli arsartartuini pikkorinnerit peqataasinnaanatik nalunaarput, taamaalilluni anngunniunneq pissanganarsinnaalluni. 

Kingulliulluni peqataasinnaanani nalunaarpoq Minik Dahl Høegh GOG-mi unammisartuusoq. Minik Dahl Høeghip isikkaminik ajornartorsiuteqarnini pissutigalugu peqataasinnaajunnaarpoq. GOG-mi unammeqatigisartagaa Akutaaneq Kreutzmannip anngunniunnermi peqataanissaa aamma nalornissutigineqalerpoq.

GOG-mi Håndboldligami pissartanngorniutivinnissamut anngunniarluni maannakkut sukataartupilussuupput. GOG unamminerit sisamat kingulliit ajorsarnikuupput, arfininngorpat GOG Mors Thymut unamminermini qanoq inerneqarumaarnersoq apeqqutaajumaarpoq Akutaaneq Kreutzmann Mexico-mut anngunniunnermut peqataasinnaassanersoq. 

Unamminassaqaaq
- Minik Dahl Høegh Akutaaneq Kreutzmannilu anngunniunnermut peqataassanngippata unamminartorujussuussaaq. Nunanut allanummi unammigaangatta marluullutik qulit 15-illu akornanni isertitsisarput, nunanut allanut unammisartuni sungiusaasoq Niels Møller Sermitsiaq.AG-mut oqarpoq nangillunilu:

- Naatsorsuutigineqarnikuugaluarpoq anngunniunneq Nuummi ukiaq ingerlanneqassasoq, tassani Minik Dahl Høegh Akutaaneq Kreutzmannilu peqataasimassagaluarput ajornartorsiutitaqanngitsumik.

- Qujanartumilli allanik pikkorissunik taarsiisinnaasunik unammisartoqarpugut. Misilittagaalli annikinnerupput, kisianni isumalluarpunga, nunanut allanut sungiusaasoq oqarpoq.

Nunanut allanut unammisartut arfininngorpat Københavnimit aallassapput, Mexico City-milu marlunngornermi februaarip 25-ani Cuba unammissallugit. Taamaasilluni nunanut allanut unammisartut sungiusaqatigiinnissaminnut periarfissaqassapput. 

Peqataasinnaanngitsut arlaqartut
Aqqaluk Sørensen Århus Håndboldimi unammisartoq Angutimmarik Kreutzmannilu Nordsjælland Håndboldimi unammisartoq peqataasinnaanatik nalunaareerput. Minik Dahl Høegh aamma uggorineqartumik peqataasinnaanani nalunaarpoq, Akutaaneq Kreutzmannilu peqataanissaa arfininngorpat aatsaat paasinarsiumaarluni. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER