ICC soraarsitsisariaqalerpoq

Inuit Issittormiut Siunnersuisoqatigiiffiata Nunatsinni siulersuisui ataatsimeeqqammerput 2014-imut aningaasaliissutit Inatsisartuni ukiarmi annertuumik appartinneqarnerisa kingorna iliuusissat pillugit nalilersorniarlugit.

Aningaasaliissutit apparnerat erniinnaartumik ICC-mut sunniuppoq, tassami Nuummi allaffeqarfimmi sulisut arfineq pingasuusut ilai ajoraluartumik akissaarunneqassammata, taamaalillunilu ukiuni arlariinni kalaallinik sulisunik piukkunnarsaaneq ingerlareersoq unittariaqassammat akissaarunneq pissutigalugu. ICC -p ajuusaarutigaa aatsitassarsiornermut atatillugu tusarniaanermi kalaallinik sulisunik piukkunnarsaaneq taamaatinneqassappat.

Inatsisartut Aningaasanut inatsisaanni 2014-imut atuuttumi ICC-mut aningaasaliissutit 4,3 mio -ninut apparput ukiullu tamaasa miliuuninik appartinneqartassallutik 2017-ip tungaanut.

Naggueqatigiit suleqatigiiffianni siulittaasoq Aqqaluk Lynge oqarpoq:

- Appartitsiniarneq aalajangiusimaannassappat qularnanngilaq naggueqatigiinnik kalaallit suleqateqarnerat maangaannaq kipitinneqassasoq. Tamatuma kingunerissavaa Nalaalagaaffiit Peqatigiinni, FN-imi Arktisk Rådimilu Inuit nipaat tusarsaajunnaassasoq. Suliat taamaattut Nunatsinni pisortanit suliarineqarneq ajorput tassami Naalagaaffiup susassarisai Nunatsinni oqartussaaffigineqanngillat, taamaallaalli inuinnaat kattuffiisigut tamakkununnga anngussinnaavugut, Aqqaluk Lynge oqarpoq.

ICC-p ulluinnarni suliaasigut sunniuttussat pingaarnersaraat aatsitassarsiornermut tunngatillugu tusarniaanermut suliaqarneq, januariinnarmi akisassat 24-upput! ICC ukiuni kingullerni sulisorisamigut piukkunnarsaasariaqarsimavoq ullutsinnut naleqquttumik aatsitassarsiornermi suliat nalilersorniarnissaannut. Kalaallit inuusuttut ilinniagartuut sungiusarneqartut ajoraluartumik aasamut sapanginneqassappata tamanna annertuumik annaasaqaataassaaq. Aamma inuiaqatigiinnut iluaqutaasumik sulineq maanngaannassaaq.

Aningaasanut inatsimmi aningaasaliissutit apparnissaat sioqqullugu Naalakkersuisut ICC tusarniaqqaarsimanngilaat kiisalu pisortatigoortumik suliaq amigaateqangaatsiarluni. Aamma Inatsisartut oqallinneranni ajuusaarnarpoq paasillugu qinikkat ilaasa nunat inoqqaavisa pisinnaatitaaffii aammalu inuinnaat kattuffiisa inuiaqatigiinni demokratiskiusumik ingerlatsiviusumi pinngitsoorneqarsinnaannginnerat pillugu qaammaasaqaqqalaarnerujussuat. ICC-mit erseqqissaatigineqarpoq Nunatsinni politikikkut namminersorluni ingerlatsinermi demokratimilu nutaraasumi nunani allat ilinniarfigisariaqarigut demokratimik ingerlatsissagaanni inuinnaat namminneq kattuffiisa akuunerat tassaammat inuit tamat oqartussaaqataanerata sukarisaa.