Skip to main content

20 millioner koruunit eqqartuussiveqarnermut immikkoortinneqarput

Suliassat kinguaattooqqasorpassuit pissutigalugit eqqartuussiveqarneq susinnaajunnaaqqavoq, Politiken arfininngornermi allappoq. Suliassat 8.000-t missarpiaanniittut eqqartuussivikkoortinneqarnissaminnut utaqqipput

Suliassat kinguaattoortorpassuit pissutigalugit nunatsinni eqqartuussiveqarneq unittooqqavoq, Politiken arfininngormat allappoq. Suliassat maanna 8.000-t missarpiaanniittut Nunatsinni eqqartuussivikkoortinneqarnissaminnut utaqqipput.
Eqqartuussivinnut Aqutsisoqarfiup iluani allakkiami atuarneqarsinnaavoq suliassat utaqqisut ima amerlatigilersimasut Kalaallit Nunaanni politimesterip pinerluttulerinermi suliassat arlalissuit taamaatiinnartalersimagai, pissutigaluguy naliliigami suliassat ima sivisutigisumik suliarineqassasut unnerluutigineqartut pineqaatissinneqarsinnaanatik.
– Suliamik naammaginartumik sivisussusilimmik sulairinninnerua persuttaanermik suliassat nalinginnaasut ukiut aappaata affaaniit ukiut marluk angullugit sivisutigisumik suliarisaratsigik? Suliassap taamaattup suliarineqarnissaanut Danmarkimi piumasaqaataavoq ullut 30-t iluanni suliarineqassasoq. Isumaqarpunga eqqartuussisut sinnerlugit oqartoqarsinnaalluartoq suliassat taama amerlatigisut akisussaafferujussuartut artukkiisorujussuartullu misigisimanartut, Birgit Skriver, Kalaallit Nunaata Eqqartuussiviani pisortaq eqqartuussisorlu oqarpoq.
– Inuttut artornartorujussuuvoq innuttaasut sullissinnaannginnerat eqqortullu naapertuilluarnerillu innuttaasut pisariaqagaat atuutseqataatillugit, taanna Politiken-imut oqarpoq.
Suliassarpassuit tusintillit ukiuni arlalinni amerliartorsimapput tamannalu ajornartorsiornartumik suliassat sivisoorujussuarmik suliarisarnerannik kinguneqarpoq, Birgit Skriver paasissutissiivoq. 2010-mili eqqartuussisoqarfik immikkut sakkortuumik eqqugaavoq, nunatsinni eqqartuussiveqarneq aaqqissuuteqqinneqarmat. Aaqqissuusseqqinnerup kinguneranik akiliisitsiniartarneq politiinit isumagineqartarunnaarpoq, eqqartuussivinnili pisalerluni. Taamaattumik 2010-p ingerlanerani akiliisitsiniarnermik suliassat eqqartuussivimmi suliassanut utaqqisunut 2.500 aamma 3.000 akornanni amerleriartitsipput.
Kalaallit Nunaanni pissutsit ima erloqinartigaat eqqartuussiveqarneq nunani siuarsagassaniinnaq atuuttunut sanilliunneqarsinnaallutik, Kalaallit Nunaata Eqqartuussiviani pisortaasimasoq eqqartuussisorlu Thomas Trier Hansen isumaqarpoq.
– Kalaallit Nunaanni eqqartuussiveqarneq ingerlalluanngilaq, inuinnarnut suliassat, pinerluttulerinermut suliassat imaluunniit ilaqutariinnut suliassat eqqarsaatigalugit. Eqqartuussisunik allattaanillu amigaateqartoqarpoq. Ajornartorsiutaavoq suliassat amerlassusaat qanorlu sivisutigisumik suliarineqartarnerat pissutigalugu eqqartuussisoqarfimmik ataqqinnittoqarunnaarnera. Sorpassuartigut nunamut siusarsagassamut eqqaanarpoq, taanna Politiken-imut oqarpoq.
Eqqartuussisoqarfik, Kalaallit Nunaata inuinik 56.000-nik sullissisussaq, qallunaat eqqartuussiviinut ilaavoq taamaattumillu Inatsisinik atortitsinermut Ministereqarfiup akisussaaffiisa ilagalugu. Kalaallit Folketingimut ilaasortaatitaat sioorasaarisimapput ukioq manna aningaasanut inatsimmut akerliullutik taasiniarlutik, suliassarpassuit ikilisarneqarnissaannut ingerlaannavik aningaasanik immikkoortitsisoqanngippat. Ippassaq kingusissukkut inatsisinik atortitsinermut ministeri Morten Bødskov (S) aalajangerpoq kissaatigisaq tamanna naammassiniarlugu.
Naalakkersuisut aalajangerput ukiunut tulliuttunut pingasunut suliassat ikilisarnissaannut immikkut ittumik suliniuteqarnissamut 20 millioner koruunit immikkoortinniarlugit, inatsisinik atortitsinermut ministeri mail-ikkut Politiken-imut paasissutissiivoq. Aningaasat 2014-imut aningaasanut inatsimmi ilanngunneqassapput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER