søsikkerhed

Issittumi imaatigut angalaneq - unammillernartorujussuaq

Nunat tamat akornanni issittumi imaatigut maleruagassaliornissat suliarineqarnerisa 2014-imi naammassineqarnissaat naatsorsuutigineqarpoq 2016-imi akuersissutigineqarlutik

- Isumaqatigiinniarnerit sivitsortoorput tamannalu pissutigalugu piffissaq sivisulaartoq ingerlassaaq issittumi maleruagassat atuutilertinneqarnissaannut, imarsiornermut inspektør Allan Idd Jensen oqarpoq. Royal Arctic Linemi atorfeqarpoq Danmarks Rederiforeningimilu issittumut tunngatillugu suleqatigiissitami siulittaasuulluni.

Issittumi maleruagassaq (polarkoden) taassaavoq nunat tamat akornanni maleruagassiat, taakku umiarsuannit avannaarsuani issittumi imaluunniit sikuiuitsumi kujallermi angalatillutik eqqortittussaavaat. Umiarsuit sumiiffinni taakkunani angalasut nalorninartunik arlaqartunik naammattuugassaqarput. Tassaasinnaasunik sila ajornera imaluunniit imaani sikuusumi imaluunniit sikoqartumi angalanermik misilittagaqannginneq.

Issittumi maleruagassaq SOLAS-imut ilassutaavoq, tassani imarsiornermi isumannaallisaanermik isumaqatigiissut pineqarpoq. Tassani ilaatigut pineqarput umiarsuit sananeqarnerat, annanniutitigut atortut, ikkuallattoornermi qatserutit, usinik navianartunik passussineq, attaveqaatigitigut atortut ilaalu ilanngullugit. Isumaqatigiissut pilersineqarpoq Titanicip umiunerata kingorna.

- SOLAS-imi suut tamarmik matussuserneqarput tamanna pissutigalugu issittumi maleruagassat ilanngunniarneqarput. Malerugassani ilaatinneqassapput avannaarsuata issittup aamma sikuiuitsup kujalliup imartaani angalanerni isumannaallisaanermut aamma avatangiisinut tunngatillugu piumasaqaatit, ilaatinneqassallutillu umiarsuit sananeqaataannut aamma atortuinut piumasaqaatit arlaqartut, Allan Idd Jensen oqarpoq.

- Issittup imartaani angalatilluni qanoq iliornissamut arlalinnik piareersaateqartoqartariaqarpoq. Sila assut ajorsinnaavoq aamma sumiiffiit akuttunngitsumik inuilaajusarput. Ajutoortoqassappat annaassiniarnermut periarfissat ungasittarput taamaattumillu umiarsuit assersuutigalugu tassanngaannartumik pisinnaasunut, nunamit ikiorneqartinnatik piareersimasariaqarput, tamatumani ikkarlinneq imaluunniit mingutsitsineq ilaapput.

- Unamminartoq alla tassaasinnaavoq ukiup ingerlanerani piffissap ilaani ulloq unnuarlu qaamasarpoq piffissanilu allani ulloq unnuarlu taartarluni.

- Taamatuttaaq Kalaallit Nunaata eqqaata ilaa suli uuttortarneqanngilaq. Qanoq iliortoqarsinnaava soorlu assersuutigalugu ajutoortoqarnissaa pinaveersaartinniarlugu. Tassaapput ilaatigut sammisat tamakku issittumi maleruagassanut atatillugu oqaluuserineqartut ilaat.

Umiarsuit sikusiornissamut qajannaallisakkat
Isumaqatigiinniutigineqartut ilagivaattaaq umiarsuit sikusiornissamut qajannaallisagaanngitsut avannaarsuani issittup imartaani aamma sikuiuitsup kujalliup imartaanni angalasinnaassanersut. Sikusiornissamut qajannaallisaaneq tassaavoq piumasaqaat umiarsuit qanoq ninngutiginissaannut tassa sikup issussusia aalajangersimasoq imaluunni imaatigut sikoqartukkut angalasinnaanissaminnut.

- Aasaanerani imartaqartarpoq sikoqanngitsunik. Umiarsuit sikusiornissamut qajannaallisagaanngitsut avannaarsuani issittup imartaani aamma sikuiuitsup kujalliup imartaanni angalanissaminnut akuerisaajunnaarpata, taava tamatuma kingunerissavaa umiarsuit assartuutit imaluunniit umiarsuit takornarianik angallassisartut, sikusiornissamut qajannaallisarneqarsimanngitsut, Kalaallit Nunaannut angalaqqusaajunnaarnerat. Uanga isumaqarpunga kukkunerussasoq imaatigut taamatut angalasinnaaneq inerteqqutigilivissallugu.

- Imaatigut angalanissaq pissutsit tunngavigalugit pilersaarusiorneqarsinnaavoq. Ukiummi ingerlanerani piffissap ilaa sikoqanngivittarpoq, Allan Idd Jensen oqarpoq.

Powered by Labrador CMS