urandebat
Uranimut akerliussutsimik takutitsineq alla
Pinngasunngorpat ualikkut soqutigisaqaqatigiiffik ´Naamik qujaannarpunga´ akerliussutsimik takutitseqqissaaq, taannalu Inatsisartut ataatsimiittarfiata saavani naassaaq
Soqutigisaqaqatigiiffiup ´Naamik qujaannarpunga´ pingasunngorpat ualikkut takuteqqinniarpaa, uranimut atortussiassanullu allanut radiop qinngorneranik ulorianartumik akulinnut akuersaanngilluinnarnerup atorunnaarsinneqarnissaanik Siumup tunngaviusumik aalajangiivigisassaatut siunnersuutaanut, soqutigisaqaqatigiiffimmik ilersuisut akerliusut.
Tamanna pissaaq sisamanngorpat aalajangiivigisassatut siunnersuutip Inatsisartuni aappassaaneerneqarnissaa - taamaasillunilu aalajangiisuusumik suliarineqarnissaa - sioqqullugu akerliussutsimik takutitsinikkut.
´Naamik qujaannarpunga´´ malillugu akerliussutsimik takutitsinissami siunertaavoq nalunaajaatit makku Inatsisartunut ingerlateqqinnissaat, neriuutigalugu ilaasortat ataasiakkaat oqallinnermi tamakkua isiginiassagaat:
Akuersaanngilluinnarnerup atorunnaarsinneqarnissaa kinguartinneqassasoq.
Aalajangiisoqartinnagu Naalakkersuisut aaqqissuussaasumik, attuumassuteqanngitsumik paasiuminartumillu paasisitsiniaassasut oqallitsitsissasullu.
Nunap inuiisa kiffaanngissusilimmik, siumut paasissutissiisumillu akuersinissaannut pisinnaatitaaffii naapertorlugit innuttaasut akulerutsinneqarnissaannik aalajangersakkat ataqqineqarnissaat malinneqarnissaallu pingaaruteqartutut isigineqartoq.
´Naamik qujaannarpunga´-p kajumissaarutigigaa aatsitassarsiornermi periarfissat allat, akuersaanngilluinnarnermik killilerneqanngitsut, sammineqarnissaat, uranimik piiaanissaq salliutinnagu.
Akerliussutsimik takutitsilluni ingerlaaqatigiinneq aallartissaaq pingasunngorpat nalunaaqutaq 16.30, katersuuttarfimmit Amisumit Inatsisartut ataatsimiittarfiata tungaanut ingerlaaqatigiilluni.
Atuaruk "Uranimut akerliulluni atsiornernik katersuineq"
Assit takukkit "Uranimut akerliussutsimik takutitsisut aporfissinneqarput"
Atuaruk "Akersaanngilluinnarnerup atorunnaarsinnissaanut demo"
´Naamik qujaannarpunga´ isumaqarpoq:
Uranimik piiaaneq atortussiassanik sunilluunniit allanik piiaanertut isigineqarsinnaanngitsoq.
Uranimik tunisassiornermi radiop qinngorneranik sinnikut inissinneqartarnissaannik ajornartorsiutip nunarsuarmioqatigiinni suli aaqqiissutissarsineqarsimannginneranut ernumassuteqarnissamut tunngavissaqartoq.
Ernumanartoqartoq nunat, soorlu Japanip Tysklandillu, ukiorpassuarni uranimik tunisassianik atuinermik misilittagallit, tamakkua atorunnaariartoraat, tamatumani radiop qinngornerisa ulorianartut kinguneqaataat ernumanartoqartikkamikkit, nunatta tamatuminnga misilittagaqanngitsup tamakkuninnga atuineq aallartinnialeraa.
Pakatsinartoq akuersaarneqarsinnaananilu Naalakkersuisutta, innuttaasunik tamanik illersuiniartussaagaluit, taarsiullugu avissaartuutitsimmata akerleriissutigineqartumik siunnersuuteqarnermikkut.