Skip to main content

Assit: Nunatsinni erngup nukinganik nukissiorfittaaq

Erngup nukinganik atuineq pineqartillugu nunarsuarmi siuttunut ilaavugut. Nunatsinni erngup nukinganik nukissiorfiit tallimassaat tallimanngornermi atoqqaartinneqarpoq. – Tassaavoq namminiilivinnissamut aqqutissaq, atoqqaartinneqarnerani oqartoqarpoq

Miiti Lyngep tanngassimaaqaluni assiliiviillu qaammallaataataannit qinngorfigineqarsimalluni erngup nukinganik nukissiorfittaaq Ilulissaniit 50 kilometerinik ungasissusilimmiittoq tallimanngornermi ullup-qeqqata missaani atoqqaartippaa.

Erngup nukinganik nukissiorfik nunatsinni maannamut sanaartukkani annerpaanut ilaavoq.

- Nukissiorfik ullumi atoqqaartitarput alutornarluinnartuuvoq. Qaavaniit annikitsunnguatut isikkoqarpoq, kisianni illoqarfik Ilulissatut ittoq tamakkerlugu innaallagissamik pilersorsinnaallugu. Ilulissatulli 9/10-ia nunap qaavata ataaniippoq, oqarpoq.

Naalakkersuisunut ilaasortap qaleq qioreeramiuk nunap iluanut itisuumiittumut ammukarpoq nukissiorfiup uummataa, sulluliarsuup isuaniittoq, nammineq isiminik takusinnaajumallugu.

Inuppaalussuarnik malitseqarpoq, ilaatigut nukissiuuteqarnermut pisortaq Henrik Estreup, Islandip aallartitaat toqqarneqaqqammersoq aamma minnerunngitsumillu sulisartut, suna tamaat naammassiniarlugu naggataa tikillugu tamaviaarlutik sulisimasut.

Erngup nukinganik nukissiorfik Paakitsumiittoq nunatsinni nukissiorfiit tallimassaraat. Siulleq Nuummiittoq 1993-imi atorneqalerpoq, kingornalu ilaatigut Tasiilami, Narsami Sisimiunilu nukissiorfiit malinnaatinneqarlutik.

- Nukissiorfittaarput aqqutigalugu nukissamik ataavartumik atuinerput tamarmiusoq 70 procentinik annertussuseqalerpoq. Nunamut nunatsitut ittumut naammassisaavoq imaannaanngitsoq. Nunarsuarmi nunat maanisut peqataasinnaasut amerlanngillat, nukissiuuteqarnermut pisortaq Henrik Estrup oqarpoq.

- Tamanna tassaavoq allanik isumalluuteqarunnaariartornermut, nammineernerulernissamut, aqqut, ilassuteqarluni oqarpoq.

Ilulissani nukissiorfittaaq 600 millioner koruninik akeqarpoq. Miiti Lynge naapertorlugu aningaasat atorluarneqarput:

- Erngup nukinganik nukissiorfimmit nukissamik mingutsitsisuunngitsumik atuinitsigut nukik pinngortitameersoq innaallagissamik pilersornissatsinnut atorparput. Erngup nukingata taamaalilluni nutaaliaasumik pinngortitamut atassuserpaatigut. Erngup kaaviiaarnera iluaqutigaarput: Aputip nakkarneraniit aakkarninnguullunilu iminnguunnermigut kaavittut aqqusaarlugit ingerlaarneranut.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER