svedigt

Kalaallit Nunaat kiannermik rekordileerujussuarpoq

DMI-p Nunatsinni silasiorfiini marlunngormat kiassutsimik qaffasinnerpaamik uuttuisoqarpoq - nalunaarsuisarnerit 1958-imi aallartinneqarsimapput

Sapaatip akunnerani uani marlunngormat ualikkut nalunaaqutaq 16 missaani DMI-p Maniitsumi silasiorfiata 25,9 gradinik kiattoq uuttorpaa.
25,9 gradimik kiassutsimik uuttuineq 1958-imi nalunaarsuisoqartalermalli DMI-p silasiorfiini uuttukkat qaffasinnersaraat. Siusinnerusukkut rekordiusimavoq 25,5 gradit, Kangerlussuarmi 1990-imi juulip 27-anni uuttorneqarsimasoq.
Nunasarnernerup sunniutaa
Kalaallit Nunaata qulaani naqitsinertuffik Baffin Islandimi naqitsinikiffimmik akugami nunasartitsilerpoq. Tamatumunnga uppernarsaataavoq silaannaap panernerujussua, 20 procentit inorlugit isugutalluni.
Maniitsumi silasiorfik immap killinganiippoq ualikkullu seqernup imaani qinngui qaffasinnerusumik uuttortotseqataasinnaapput.
Sunniut tamanna aamma Sisimiuni atuuppoq, tassani 21,4 gradinik kiassuseqartoq uuttorneqarsimagami, assersuutigaluguli sunniut Kangerlussuarmi atuutinngilaq. Tassani "taamaallaat" 20,4 gradinik kiattoq uuttorneqarsimavoq, nunasarnertilugu kiannerusaraluarluni.
Qaqutigoortumik kiannersua silallu pissusia tamatuminnga pilersitsisoq ´nalinginnaanngitsutut´ taaneqarsinnaanngillat, aappaatigulli qularnanngivissumik Kalaallit Nunaat kiatsikkiartorpoq. Taamaasilluni piffissap ingerlanerani ´kiannermik pisut´ siulianit kiannerulaalernissamik ilimanarsisitrsipput.
Kalaallit Nunaannut silap pissusiata sualttumik sunniutai allat takukkit una toorlugu
Allaaserisaq una ilanngunneqarpoq DMI isumaqatigiissuteqarfigalugu. Oqaluttuaq dmi.dk-meersuuvoq allanneqarsimallunilu John Cappelenimit. dmi.dk-mi ilanngunneqarpoq 31.07.13.

Powered by Labrador CMS