Skip to main content

- Oqaaseqartannginnerput pitsaasuunngilaq

Taamatut oqarpoq namminersorlutik oqartussani atorfillit qullersaat

Namminersorlutik Oqartussani inatsiseqarnermut pisortap soraarsitaanera qassiiliuutaaleruttortoq nunami atorfillit qullersaata, Siulittaasup Naalakkersuisoqarfiani pisortap Svend Hardenbergip namminersorlutik oqartussani atorfillit tusagassiortunut oqaaseqarsinnaanerannut periartfissat maanna misissornialerpai.
– Maanna periuseq, tassa namminersorlutik oqartussat iluanni pissutsit pillugit tusagassiorfinnut oqaaseqartannginnerput, maanna ersarissumik paasinarsivoq siunertassaqanngitsoq, tassa qularneq taava uagutsinnut iluaqutaassanngimmat. Oqaaseqartannginnerput nalinginnaasumik pitsaasuunngilaq, Svend Hardenberg oqarpoq.
Tamanna pivoq AG-p oqaluttuarimmagu namminersorlutik oqartussani inatsiseqarnermut pisortaq Andreas Salmony - aviisip paasisaqarfii pingasut imminnut attuumassuteqanngitsut malilugit - juunimi soraarsitaammat pissutigalugu Julie Rademacherip Naalakkersuisut siulittaasuannut atorfininneranut tunngasut aviisimut tunniunneqarnissai kimigiiserutigimmagu.
Atuaruk "Naalakkersuisoqarfimmi pisortaq: Taamaattumik oqaaseqarneq ajorpugut"
– Tusagassiorfinnut nalunaarummi ilaatigut allapputit ´illup iluani pissutsinik tunngaveqarluanngitsunik oqaaseqartoqarlunilu allaaserinnittoqartartoq. Qanorpiaq isumaqarpit?
– Immikkuualuttut pinngikkaluarlugit takusinnaavarput AG-p paasisaqarfiit kinaassutsiminnik isertuussisut atorsimavai, taakkalualu attuumassuteqanngitsutut naatsorsuutigisinnaavakka. Taamaattumillu pisimasumi immikkoortunut tamanut ilisimanninngillat.
– AG-p oqaluttuaa ilumuunngippat taava sooq tunuartinnissaa piumasarinngilisiuk?
– Imatut oqaatigilara. Paasissutissinneqarsimavunga AG-p oqaluttuaa eqqunngitsoq, taavalu illup iluani ilumuunnginneraanissaq kissaatigisimavara, oqarfigineqarpungali oqaaseqaqqusaasoqanngitsoq.
– Nunami atorfillit nuimanersaattut oqaluttuap tunuartinnissaa nammineq piumasarisinnaannginnakku?
– Naammik taamaasiorsinnaagaluarpunga, ajornartorsiutaavorli pisimasumi immikkoortut tamaasa ilisimannginnakkit, tamanna uanga atorfininngikkallarninnit pisimammat. Atorfillit attuumassutillit naapissinnaasimanngilakka feriarneq pissutigalugu. Aammaarluguli: Ataasinngorpat naalakkersuisoqarfinni pisortat ataatsimeeqatigilerukkit oqaluuserissavarput siumut isigisumik qanoq ammanerulersinnaanerluta, Svend Hardenberg oqarpoq.
Allaaserisaq "Inatsit malinniaramiuk pisortaaneq soraarsitaavoq", AG-mi saqqummersumi atuaruk, taannalu pisiarisinnaavat uani:

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER