Skip to main content

Kalaallit Nunaat ajugaallualaavippoq

Angutit arsaattartut unamminermut piareersarnerat paatsiveqarpianngilaq, ilaatigullu Ærømut ikaartaammi atisalersortariaqarlutik

Ærømi Marstal Stationimi, Svendborgimit akunneq ataaseq minutsillu 15-it ikaartaammik ornittarialimmi, arsaalluni nunanut allanut unammisartut arfininngormat ualikkut Marstal/Rise-mut Danmarksseriami unammisartumut ajugaapput.

Unamminermut piareersarneq paatsiveqarpianngilaq taamaatiinnangajanneqarporlu. Arsaattartut Odensemit Svendborgimut qimuttuitsorput tassanngaanniillu Ærømut ilaasartaamut ilaasussaallutik. Qimuttuitsuni ajornartorsiuteqarneq pissutigalugu arsaattartut ikaartaammut inortuipput. Tullialu aatsaat akunnerit marluk qaangiuppata aallartussaavoq. Unamminerli kinguartinneqarpoq. Arsaattartut ikaartaammi atisalersorput. Ærøskøbingimi umiarsualivimmit Marstalimut kilometerit 13-it biilerput ingerlaannarlu arsaattarfimmut iserlutik.
Marstal Stadionimi kusanartumi isiginnaartut 300-t sinneqarput 40 koruuninik akiliisimasut. Isiginnaartut kingaattoornermik sms-ikkut nalunaarfigineqarput.Tribunimi grillpølsinik, immiaaqqanik sodavandinillu tuniniaasoqarpoq. Kalaallit erfalasuat takussaavoq soorunalumi unammisartuvut kalaallinit isiginnaarianit tapersersorneqarluarput. Programmimilu allassimavoq "nunamut allamut unammisoqassasoq".
Marstal/Rise
Holdi, Ærøp timersornermi tulluusimaarugaa, 2012-imi Danmarksseriamut qaffariarpoq sæsonimilu siullermi normu 7-inngorluni. Timersornikkut pisut annersaat tassaasimavoq ukiunt pingasut matuma siornatigut pokalinnanniunnermi superligami unammisartoq Silkeborg unammigamikkut. 1-3-ginnarmik ajorsarlutik 1-0-mik siuarsimareersimallutik.
Unammisartut tamarmik Ærømeersuusimapput. Tassanili najugaqarunnaarsimapput, angajoqqaalivili suli tassani najugaqarput. Marstal/Rise-mi marlulissat Patrick aamma Matthias Fleischer malunaateqarluarput. Aataavat qanga Nunatsinnit Ærømut pisimavoq Søfartskolimi atuariarluni aallaqqissimananilu.
Unammineq
MInutsi siulleq ingerlariiginnartoq angerlarsimaffimminni arsaattut 1-0-mik siuarput. Kalaallilli tunniutiinnanngillat unamminermilu sukalatsikkaluttuinnarlutik. Minutsit arfinilissaanni periarfissarujussuaq atorneqanngitsoorpoq. Immikkoortup siulliup sinnerani kalaallit naligiisitsiniarlutik tamaviaarput. Tamanna iluatsinngilaq kinguaqqingajappullu angerlarsimaffimmini arsaattup Matthias Fleischerip kalaallit målmandiat Loke Svane kiserngorukkaluarmagu. Loke Svane arsaalluaqaaq, annaallugulu muminnermilu 1-0-imik kinguarsimaannarput.

Unamminerup immikkoortuata aappaani kalaallit sukalanersaapput. Minutsit arfineq-marluk ingerlariiginnartut Norsaq Lund Mathæussen naligiisitsilluni isertitsivoq. Minutsit sisamat qaangiuttut Sakiu Lundblad unamminermi kusanarnerpaamik isertitseriarpoq kalaallit siuartingajavillugit. Målit naparutaat eqqorlugu. Minutsit 27-t qaangiuttut kalaallit saassusseqattaarnertik iluatsippaat Kaassannguaq Zeeb 2-1-imut isertitsimmat. Kalaallit saassusseqattaarnertik ingerlatiinnarpaat minutsillu tallimat sinneruttut siuaqqillutik. Unamminermi immaqa saassussinermi kusanarnerpaami Frederik Funch 3-1-imut isertitsivoq.

Kalaallit naammagisimaarinnipput
- Unamminerit tamaasa siuariartorpugut. Aallartinnerlioraluarluta nammineq unammeriaaserput atorparput assigiinngitsorpassuarnillu misileraalluta, iluarsiinerillu iluatsilluartorujussuupput, Norsaq Lund Mathæussen naammagisimaarinnittorujussuaq Sermitsiaq.AG-mut oqarepoq, Svendborgimut uterluta qatanngutaalu Kaali oqaloqatigigatsigit.
Unammisartut qallunaat arsaattarfii ivikkanik qallikkat sungiukkaluttuinnarpaat takuteqattaartarlugulu Kalaallit Nunaanni arsaattartoqartoq ilimanaateqarluartunik. Sungiusaasut aappaata Tekle Ghebrelul-ip Sermitsiaq.AG-mik oqaloqateqarluni unammisartut angusarissaarnerat nersualaarpaa.
– Imminnut paasilluarnerujartorput. Nukittussutsivut sanngiissutivullu aqullualeraluttuinnarpavut, ullumikkullu uppernarsarparput sukkassutsikkut teknikkikkullu Danmarksseriami unammisartunut sapiunnata.

Unamminissaq kingulleq
Nunanut allanut unammisartut ataasinngorpat unnukkut Danmarkimi unamminerminni kingullermi Svendborg unammissavaat, marlunngorpallu Bermudamut aallassallutik Island Gamesimut peqataajartorlutik.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER