Skip to main content

Urani Folketingimi avissaartuutsitsivoq

Kalaallit Nunaata uranimik piiaanissamut akuersissuteqarnissaminik pilersaarunni pimoorutissappagit Danmarkip nunani tamalaani inissisimanera »malunnartumik« allanngussaaq. Taamatut allappoq Berlingske

»Uranimik piiaanikkut Naalagaaffiup nunani tamalaani sakkussakillisarnissamik aammalu nukissap atom-itortup eqqissisimasumuinnaq atornissaanik suleqatigiinnermi inissisimanera malunnartumik allanngussaaq«,qallunaat naalakkersuisuisa suleqatigiissitaliaata Nunanut allanut ministereqarfimmeersup suliaminut allassimaffiani allassimavoq.
Taamatut allappoq Berlingeren, taassumalu Kalaallit Nunaanni Kuannersuarni uranimik piiaanermi isumannaatsuunikkut politikkimi kinguneqaatissat pappialartai ilisimasaqarfigai. Ilaatigut Venstre-p Kalaallit Nunaannut oqaaseqartartua siusinnerusukkullu illersornissamut ministeriusimasoq Gitte Lillelund Bech, Venstre, Berlingskemut oqarpoq:
– Nunanut allanut ministeriunissara kajungerinngilara ulloq taanna kalaallit uraniannit tunisassiaasa sinnikui Iran-imi sakkussatigut puttutissappata. Takorloorsinnaalluarpara tamanna State Department-imit (USA-mi nunanut allanut ministereqarfimmit, aaqqiss.) nipituuliorfigineqassasoq.
Taassuma tamanna oqaatigaa »qallunaat nunanut allanut politikkianni tunngaviusumik nikisitsisinnaasoq«.
Dansk Folkeparti-p suliassaq allatorluinnaq isigaa. Nunanut allanut oqaaseqartartup Søren Espersenip ajornartorsiuteqartinngilaa Naalagaaffeqatigiit uranimik avammut tuniniaasunngornissaat.
AAmma atuaruk: Uranimut akuersaannginneq ukiaru atorunnaarsinneqassaaq
– Urani niuernermi nioqqutissaavoq immussuartut, qajuusartut punnertullu. Nunat sanilivut tamangajavimmik atomip nukinganik nukissiorfeqarput. Sverige, Københavnimut iluaqutaasumik, Finland, Tyskland aamma Tuluit Nunaat atomip nukinganik nukissiorfeqarput, Søren Espersen oqarpoq.
Uranimut akuersaannginnermut atorunnaarsinneqarnerata kinguneqaatissaanut nalunaarusiaq naatsorsuutigineqarpoq ukiaru tunniunneqassasoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER