Innaallagisserisutut ilinniartoq taarseeqatigiilluni sulisoq
Innaallagisserisutut ilinniartup Ilannguaq Møllerip Odensemi taarseeqatigiilluni ilinniartutut sulinini naammasseqqammerpaa
26-nik ukiulik Sisimiormiu, maannali Nuummi najugaqartoq Ilanngulaq Møller, qaammatini kingullerni Odensemi umiarsualivimmi illorsuup Nordatlantisk Hus-ip sananeqarnerani taarseeqatigiilluni ilinniartutut sulinini naammasseqqammerpaa.
Ilanngulaq Møller, innaallagisserisutut ilinniagaqarnermini ukiunik sisamanik sivisussusillip affaanik ingerlatsereersimasoq, nalinginnaasumik Nuummi Arssarnerit-mi sulisuuvoq. Arssarnerit qallunaat innaallagisserisutut ingerlatsivissuannit Lindpro-mit pigineqartoq, Odensemilu Nordatlantisk Hus-ip sananeqarnerani innaallagisserisutut suliassat suliarai.
Lindpro-mi anguniagaavoq ingerltsiviup Odensemi lærlingiisa 14-it missaanniittut affai Kalaallit Nunaanni lærlinginik taarseeqatigiittassasut. Tassa imaappoq ukiut tamaasa lærlingit marluk-pingasut taarseeqatigiittassasut. Lindpro-p Odensemi immikkoortoqarfiani sulisut 85-iupput Danmarkimilu nuna tamakkerlugu sulisut 1100-t missaanniipput. Kalaallit Nunaanni Arssarnerit 80-it missaannik sulisoqarpoq.
Nammagisimaarinnilluarpoq
Ilanngulaq Møller Sermitsiaq.AG-mut oqaloqatigineqarluni oqarpoq ilinniagaqarnerminik toqqaasimanini Danmarkimiinninilu naammagisimaarluarlugit.
– Ilinniagaqarnerma affaa ingerlatereerpara. Ilinniagaqarnermi atuagarsornerup ilaa sisamanik immikkoortoqarpoq, lærlingit uagut ilaatigut Nuummi Saviminilerinermik Ilinniarfimmiittaarluta ilaatigullu Skive-mi Teknisk Skole-miittarluta. Allanut inassutigiinnarsinnaavara taarseeqatigiinnissamik periarfissaq taamaattoq qujarullugu atortaqqullugu. Suliatigut minnerunngitsumillu inuttut taarseeqatigiinneq taamaattoq ineriartornarluarpoq, Ilannguaq Møller Sermitsiaq.AG-mut oqarpoq.
Ilannguaq Møller qaammat ataaseq Danmarkimiissimavoq Odensemiinnerminilu Kalaallit Illuutaanni najugaqarsimalluni.