PPK-mit isornartorsiorneqareerluni akisoq

- Naalakkersuisut peqqinnissaqarfimmi sipaarniarnissamik pilersaaruteqanngillat, politikkikkut akisussaasoq Steen Lynge oqarpoq

- Naalakkersuisut peqqinnissaqarfimmi sipaarniarnissamik pilersaaruteqanngillat, Peqqissutsimut attaveqaqatigiinnermullu Naalakkersuisoq Steen Lynge, Atassut oqarpoq. Assi: Leiff Josefsen

Naalakkersuisunik pisuutitsiniaaneq tatiginninnginnerlu sapaatip-akunnerata siuliani imaaginnarpoq Peqqinnissaq Pillugu Kattuffiit, PPK, siulittaasuat Inuuti Fleisher, saqqummiussimmat. PPK tassaavoq Kalaallit Nunaanni peqqinnissamik suliallit ataatsimut kattuffiat.

Inuuti Fleischer tusagassiivinnut allakkakkut ilaatigut allappoq

- Qimussuataarpullu! Sulisut taakku qaavatigut suliakkeqqinnerasigut sipaarniartoqassasorlu tulleriissarinernilu kingullinngortinneqassapata akeqanngitsumik kiffartuussisoqarnissaq akissaqartilerniarlugu, qamutit uppitinneqarnissaat aarloqqutigivara.

PPK-mi siulittaasup saassussinera maanna peqqissutsimut attaveqaqatigiinnermullu Naalakkersuisumik Steen Lynge, Atassut, qisuariartitsivoq:

- PPK-mi ilaasortat peqqinnissaqarfimmi sulisut ilarpassui – ullut tamakkiallugit peqqinnissaqarfimmi annertuumik suliaqartuupput. Taamaammat PPK-p siulittaasuata periarfissat pinnagit ajornerulersitsinerli qitiutillugu tusagassiorfinnut nalunaaruteqarnera, uggornartutut isumaqarfigaara.

- PPK-p tusagassiorfinnut nalunaarutaa naapertorlugu Naalakkersuisut ukiumut 30 mio. koruuninik sipaarniuteqarniarsorineqarput., Naalakkersiusut Peqqinnissaqarfimmi sipaaruteqarnialersaanngimmata, taama paasinninneq akerlilertariaqarpara.

- Peqqinissaqarfiulli aningaasaqarnikkut annertuumik ilungersunartorsiortitaanera piviusuuvoq. Aningaasartuutit qaffakkiartuinnarnerat patsisaalluni siunissami aningaasartuutit ukiumut 20-mio. koruunit 30 mio. koruunillu akornannut qaffassapput. Taamaasilluni Peqqinnissaqarfik ukiut tamaasa 20-30 mio. koruuninik amigaateqartualissaaq. Unammilligassaq taanna iliuuseqarfiginngikkutsigu, pinngitsoorani sulisunut ilungersunartunngortussaassaaq innuttaasunillu kiffartuussineq ajorseriaateqartussaassalluni, Steen Lynge allappoq erseqqissaatigalugu; Naalakkersuisunngorninniit Peqqinnissaqarfiup aningaasaqarnikkut ilungersunartumik inissisimanerata – minnerunngitsumik Peqqinnissaqarfiup ineriartorteqqinnissaanut naatsorsuutigisat naleqqussarnissaat siunertaralugu, ajornartorsiutip tamatuma ersarissumik oqaatiginissaa assut pingaartissimavara.

Powered by Labrador CMS