- Sakkortuumik iliuuseqartariaqarpugut

Issittumi Siunnersuisooqatigiinni nunat ilaasortaasut arlallit isumaqarput nunat inoqqaavi naalagaaffiit assigiinngitsut killeqarfiisa iluanniittut naalakkersuisut isumaqatigiinniarneranni peqataasinnaanngitsut. Taakkununnga ilaavoq Sverige, pingasunngornermi Kirunami ataatsimiinnermi ukiuni marlunni siulittaasuunera taamaatittoq, ullorlu taanna Canada siulittaasuuffimmik tigummiaqalerluni. Canadali aamma isumaqataanngilaq.

- Uagutsinnut tunngassuteqartut oqallisigineqalerpata uagut isumaqatigiinniaqataanavianngilagut, Aleqa Hammond oqarasuaatikkut attaveqarfigineqarluni marlunngornermi unnukkut Københavnimit oqarpoq.

- Sverigep siulittaasoqarfimmik 2011 tigusinera sioqqullugu Danmarkip naalagaaffeqatigiivini sinniisunut pingasunut issiavissaqartaraluarpoq, Savalimmiunut, Danmarkimut aamma Kalaallit Nunaannut. Svenskilli siulittaasoqarfimmik tigusimmata naalagaaffeqatigiit ataasiinnarmik issiavissaqalerput, Kalaallit Nunaat aamma Savalimmiormiut tunorliullutik tusarnaarsinnaasut isumaqatigiinniarnivinni peqataasinnaanatik. Uagut Danmark, Kalaallit Nunaat aamma Savalimmiormiut tamanna akerliuffigigaluarparput iluaqqutaanngitsumik. Annilaanngatigaarput pissutsit tamakkua Canadap siulittaasuunerani ingerlaqqiinnarnissaat. Taamaattumik isuamqarpunga sakkortuumik iliuuseqartariaqartugut. Ullumi siusinnerusukkut ataatsimiinnermi (marlunngornermi aaqq.) naalagaaffeqatigiinnit aallartitat isumaqatigiissutigaarput isumaqatigiinniarnerni minnerpaamik issiavinnik marlunnik piumasaqartariaqarluta ataaseq Danmarkimut ataaserlu Kalaallit Nunaannut. Taanna Danmarkimit Savalimmiuniillu tapersersorneqarpoq, pingasunngornermi ullaakkut ataatsimoorussamik nalunaarutitut saqqummiunneqassalluni. Kisianni tamanna Issittumi Siunnersuisooqatigiinni nunat ilaasortat ilaasa peqataaffigiumanngilaat. Taamaattumik akerliullunga ataatsimiinnermi peqataanianngilanga, Aleqa Hammond oqarpoq.

- Isumaqarpugut Kalaallit Nunaanni innuttaasunut inuiaqatigiinnullu isumalerujussuusoq Nunatsinni pissutsit pillugit isumaqatigiinniarnerni peqataanissarput. Issittumi Siunnersuisooqatigiinni sulineq uagutsinnut pingaaruteqartorujussuummat sinaanni tusarnaartutut inissisimanissarput soqutiginngilarput. Issittumi Siunnersuisooqatigiinni sulineq unitsikkallarparput akuerineqarnissatta tungaanut, Aleqa Hammond oqarpoq, marlunngornermi Kirunamit akerliuniarluni Danmarkiliarluni aallartoq.

Taassuma neriuutigaa taamaaliornermigut Canadamit siunissami isumaqatigiinniarnernik peqataatinneqaqqilernissaq akuerineqassasoq.

- Pitsaanerusimassanngila illit ataatsimiinnerni peqataaguit amerikamiullu nunanut allanut ministeritaavannik John Kerrymik kiisalu nunat allat sinniisuinik oqaloqatiginnikkuit?

- Kalaallit Nunaannut naammanngilaq nunat allat politikerii peqatigalugit tamulugassartoqataaneq, qungujulalluni inussiarnisaarneq aamma takoqqusaarneq. Aalajangiisoqarnerini peqataarusuppugut uagut ulluinnatsinnut sunniuteqartunik. Tassa ministerit naapiffiini nerivimmi isumaqatigiinniarfiusumi.

- Isumaqatigiinniat nerrivianni issiavik ataaseq naammannginnami taava Kalaallit Nunaata naalagaaffeqatigiinnik sinniisuussaaq, Issittumi Siunnersuisooqatigiit 1996-imi Ottawami pilersinneqarmata taamannak pisoqarpoq. Taanna naalagaaffeqatigiiffiup sinniiseraa.

- Siornatigut taamaasiortareerpugut. Kisianni tamannak Danmarkimit ingerlatsisoqarnissaa kissaatigineqanngilaq. Ajornarpoq. Taamaattumik aalajangertariaqarsimavugut isumaqatigiinniarnerit nerrivianni issiavinnik marlunnik piumasaqarniarluta, tamanna Danmarkimit Savalimmiuniillu tapersersorneqarpoq. Tassa Savalimmiunit tunulliunneqarnissaq akuerineqarluni. Uagut ilutsinni isumaqatigiinniarnitsinni angusarput taanna pingaaruteqaqaaq.

Aleqa Hammondip naatsorsuutigaa Issittumi Siunnersuisooqatigiinnut akerliuniarnermigut nutaanik ammaassalluni Kalaallit Nunaata isumaqatigiinniarnerni peqataalernissaannut tunngavissaasussanik.

Aleqa Hammond pingasunngornermi Stockholmiliassaaq nunani avannarlerni naalakkersuisut siulittaasuisa ataatsimiinneranni peqataajartorluni.