Kuupik: Aleqa isumatusaanngilaq
- Tusaaneqarumagaanni ataatsimiinnermi najuuttariaqarpoq, Inuit Ataqatigiit siulittaasuat Kuupik V. Kleist oqarpoq, Issittumi Siunnersuisooqatigiit Sverigemi ataatsimiinneranni Naalakkersuisut siulittaasuata Aleqa Hammondip peqataaniarunnaarneranut oqaaseqarluni
Nunat pissaanilissuit Issittumi Siunnersuisooqatigiinni peqataanerat pissaaneqarniunnermik ilaqarpoq. Taamaammat nunat namminersorfiusut toqqaannartumik peqataaniarnerat ajornakusoorpoq. Tamannali allanngortinniaraanni ataatsimiinneq qimallugu aninikkut anguneqarsinnaanngitsoq, Inuit Ataqatigiit siulittaasuat Kuupik V. Kleist isumaqarpoq.
Naalakkersuisut siulittaaasuat Aleqa Hammond Issittumi Siunnersuisooqatigiit ataatsimiinneranni ministerit ataatsimiinneranni peqataaniarani aalajangerpoq siulittaasoqarfiup matoqqaneranut akerliulluni. Taanna neriuppoq tulliulluni siulittaasuusussaq Canada ammanerunissaanut sunnersinnaassallugu. Tamannali ilimagisariaqanngitsoq, Kuupik V. Kleist isumaqarpoq.
Issittumi pissaaneqarniunneq
- Aleqa Hammondip ataatsimiinnermi ajuallassimarpalaarluni peqataannginnera isumatusaarnerunngilaq. Isumaqatigaara kissaatigimmagu Issittumi Siunnersuisooqatigiit ataatsimiinneranni toqqaannartumik peqataasariaqaraluartugut. Kisianni anguniagarput qanillinavianngilarput ataatsimiinnermi peqataaniarata aalajangernitsigut, Kuupik V. Kleist Sermitsiaq.AG-mut oqarpoq.
Nunattali toqqaannartumik peqataasinnaannginnera nutaajunngitsoq Kuupik V. Kleist oqaluttuarpoq.
- Nunat pissaanilissuit siunertaat allaanerupput. Taakku nunat inoqqaavisa sunniuteqarsinnaanerat naqisimavaat. USA Issittumi Siunnersuisooqatigiinni peqataavoq Alaskap inissisimanera aqqutigalugu aamma Canadap ilaani nunap immikkoortui issittumiittut aqqutigalugit Canada peqataavoq. Taakku Issittumi siunnersuisooqatigiinni inissatik annaarusunngilaat, Kuupik V. Kleist oqarpoq.
Nunat inoqqaavisa kattuffii soorlu ICC aamma Saamit ataavartumik peqataasarput taamaattorli nunatut ilaasortatut pisinnaatitaaffeqaratik.
- Issittumi nunat arfineq pingasut nunanut allanut ministerii najuutissapput. Nunatta oqariartuutaanik apuussinissamik manna periarfissatsialassuugaluarpoq. Taamaammat ataatsimiinnermi najuunniarani aalajangerneq isumatusaarnerunngilaq, Kuupik V. Kleist oqarpoq.