Albatros Nunatsinnut tammartajaartoq
Ukiut 50-it taama pisoqarsimananani albatrosimik Nunatta imartaani siumuisoqarpoq
Aalisarnermik piniarnermillu nakkutilliisut Jens Ostermann aamma Hans Mølgård Sisimiuneersut tupigutsarujussuarput qaqutigoorluinnartumik takugamik. Tassami albatros ækvatorip kujataani najugaqartoq Sisimiut eqqaannut tammatajaarsimasoq, Pinngortitaleriffik nalunaarpoq.
- Tammartajaavissorpoq immaqa sumiissusersiutaa ajortissimanerami imaluunniit anorersuassaarsuup tinngullugu maanga apuussimanerpaa. Tassami timmiarsuaq nalinginnaasumik sumiiffigisartakkaminiit ungasissorujussuarmut pisimavoq, nalinginnaasumimmi nunarsuup kujasinnerusortaani uumasuummat, Pinngortitaleriffik nalunaarpoq.
Oqaluttuarisaanermut ilannguppoq
Jens Ostermannip aamma Hans Mølgårdip albatros assileriarlugu Pinngortitaleriffimmut nassiuppaat. Tassanilu tupaallattunnguaqarpoq. Taakku timmissanik ilisimatuumut nassiuteqqippaat tassanilu uppernarsarneqaqqippoq albatrosi Sisimiut eqqaanni tammartajaarsimasoq.
- Malamuk malillugu timmisoq takoqqaarparput tupinnaannartumillu angineruvoq. Taava qujanartumik saneqquteqqippaatigut taamaasimmallu assilivarput. Tassanngaanniit avammuinnaq timmivoq takoqqinngilarpullu, Jens Ostermann Sermitsiaq.AG-mut oqarpoq.
Pinngortitaleriffiup paasissutissaatai malillugit ukiut 50-it kingulliit albatrosimik Nunatsinni takusoqarsimanngilaq.
Taamaammat Hans Mølgård aamma Jens Ostermann tassaapput inuit Nunatta imartaani albatrosimik takusimasut ikittunnguit ilaat. Albatrosi Nunatsinni eqqissisimatitaalluinnarpoq.